Արդեն մի քանի օր է՝ Հալեպում ջրի խնդիր է առաջացել: «Առաջին լրատվական»-ի հետ զրույցում Հալեպի Հայ ավետարանական համայնքի համայնքապետ, վերապատվելի Հարություն Սելիմյանը նշեց, որ իրականում ջուր չլինելու պատճառը Հալեպ քաղաք ջուր բերելու դժվարություններն են, որոնք կապված են էլեկտրականության հետ: Խնդիրն առաջացել է Հալեպի հյուսիսարևելյան կողմում ահաբեկչական պայթյունի հետևանքով՝ ջրի մայր խողովակը վթարվել է:
«Երևի առաջիկա երկու օրերի ընթացքում այս հարցը լուծում կստանա, էլեկտրականություն կկարողանան հասցնել ջուր մատակարարող շրջաններին, և կրկին ջուրը կվերադառնա Հալեպ: Եվ եթե դժվարություններ ունենանք ընդդիմադիր զինյալ խմբավորումների հետ, թույլ չտան, որ այդ նորոգման աշխատանքները կատարվեն, ես կարծում եմ, որ ահավասիկ նոր հարց կառաջանա՝ մի քանի ամիս Հալեպը առանց ջրի կմնա»,- ասաց նա:
Ընդհանուր առմամբ, Հարություն Սելիմյանի խոսքով, վիճակը վատ է այն առումով, որ արտագաղթ է տեղի ունենում: «Հալեպը կպարպվի ընդհանրապես իր բնակիչներից, և մենք՝ որպես հայություն, որովհետև փոքրամասնություն ենք, արդեն ազդեցիկ է դառնում որևէ ընտանիքի բացակայությունը: Շատ հայ ընտանիքներ արդեն պատրաստվում են մեկնել և դպրոցների այս շրջանում ուրիշ տեղ են գնում և իրենց զավակների ուսումն ապահովում: Սա վատառողջ իրականություն է, և պետք չէ նման բանի ընթացք տրվի: Մեր հայերի մեկ երրորդն արդեն վերանում է»,- տեղեկացրեց նա:
Այս օրերին հայերին ջրով ապահովում է եկեղեցին: «Մեր եկեղեցու բակի մեջ ջրհոր ենք բացել ջուր են դուրս բերում և ժողովրդին բաշխում»,- ասաց Հարություն Սելիմյանը:
