ԵԱՀԿ Մինսկի խմբի համանախագահները Վիեննայում հանդիպում են ունեցել ԵԱՀԿ գլխավոր քարտուղարի հետ ու ծանոթացրել ղարաբաղյան հակամարտության խաղաղ կարգավորման գործընթացին: Նրանք նաև ներկայացրել են Դաշտային դիտարկման առաքելության՝ ԼՂ հարակից շրջաններում վիճակի մասին զեկույցը:
ԵԱՀԿ պաշտոնական կայքում հրապարակված տեղեկատվության համաձայն, համանախագահների հայտարարության մեջ ասված է, թե ԼՂ հարակից տարածքներում դաժան իրականությունը վկայում է , որ ստատուս քվոն պահպանելը անընդունելի է, և միայն բանակցությունների միջոցով խնդրի խաղաղ կարգավորումը կարող է լավ ու հստակ տեսանելի հեռանկարներ բացել նրանց համար, ովքեր այսօր այնտեղ ապրում են, և ովքեր պատրաստվում են ապրել:
Ներկայացված զեկույցում արտահայտված է նաև համանախագահների տեսլականը ԼՂ հարակից տարածքները հակամարտության տարածքից ծաղկող տարածքի վերածելու ուղղությամբ:
Համանախագահները հայտարարել են, թե մոտ ժամանակներս կրկին կայցելեն տարածաշրջան` շարունակելու քննարկումները հիմնարար սկզբունքների շուրջ, հիմնվելով այս տարվա մարտի 5-ին Սոչիում ձեռք բերված դրական տեղաշարժի վրա: Նրանք նաև կողմերի հետ կոնկրետ միջոցներ կմշակեն հրադադարի ռեժիմի խախտման դեպքերի հետաքննման` Սոչիում ստանձնած պարտավորությունների կատարման առումով:
Կարևորելով կողմերի զսպվածության դրսևորումը ինչպես սահմանին, այնպես էլ հայտարարությունների մեջ՝ համանախագահները անընդունելի են համարում ուժի կամ դրա սպառնալիքի ցանկացած դրսևորում, այդ թվում նաև՝ քաղաքացիական օդանավերի նկատմամբ: Այս կապակցությամբ նրանք վճռականորեն դատաապարտում են անիմաստ սպանությունների շարունակումը և պատասխան հարվածները ճակատի ողջ երկայնքով: Համանախագահները դարձյալ վերահաստատել են իրենց նախկին դիրքորոշումը, որ կողմերը պետք է իրենց բնակչությանը նախապատրաստեն խաղաղության, այլ ոչ թե պատերազմի:
