Մեծ ավտոբուսների տոմսը մոտ 2 անգամ պետք է էժան լինի այսօրվա միկրոավտոբուսների տոմսի գնից: Այս մասին այսօր լրագրողների հետ հանդիպմանը ասաց Սպառողների ասոցիացիայի նախագահ Արմեն Պողոսյանը: Անդրադառնալով մետրոյի սակագնի բարձրացմանը, նա ասաց, որ դա «հերթական պատուհասն է, որ շատ շուտով կիջնի մեր գլխին»:
«Մետրոյի 2 նոր կայարաններ կառուցելու համար անհրաժեշտ է 7-8 մլն դոլար, այդքանը չեն կարողանում գտնել, փոխարենը 15 մլն եվրո նախատեսվում է մետրոյի արդիականացման համար: Մետրոյում ոչինչ չի փոխվելու: Ոչ շարժակազմ է ավելանալու, ոչ էլ որևէ էական բան: Բայց 15 մլն եվրո ծախսվելու է, և դրա շնորհիվ աճելու է գինը:
Մեր մետրոն ժամանակին տեղափոխում եր օրական 300 հազար մարդու: Այսօր տեղափոխում է 40-50 հազար մարդու: Ինչո՞ւ: Պետք է աճի, չէ՞: Այդպիսի բան աշխարհի որևէ այլ քաղաքում չկա, դա հակասում է ամեն ինչին` տնտեսական մտքին, բանականությանը, տնտեսական քաղաքականությանը, երկրի անվտանգությանը և այլն»,- ասաց Ա. Պողոսյանը:
