Կենտրոն և Նորք-Մարաշ վարչական շրջանի ընդհանուր իրավասության դատարանում Մնացական Մարտիրոսյանի նախագահությամբ պետք է սկսվեր Հասմիկ Հարությունյանի գործի դատական քննությունը:
40-ամյա Հասմիկը, ըստ մեղադրանքի, 2010 թվականից մինչև 2012 թվականի հուլիսի 16-ը շարունակաբար, մաս-մաս գաղտնի հափշտակել է ամուսնու ծնողների ննջասենյակում պահված ու վերջիններիս պատկանող ոսկե զարդերը, ոսկե և արծաթե սպասքի պարագաները՝ ընդհանուր՝ 254 հազար 963 դոլար արժողությամբ:
Բացի այդ, ըստ մեղադրանքի՝ 2012 թվականի հունվարի 20-ին Հասմիկ Հարությունյանը հեռախոսազրույց է ունեցել ամուսնու՝ ՌԴ-ում բնակվող մորաքրոջ հետ, խնդրել է, որ վերջինս ուղարկի 4 հազար դոլար՝ պատճառաբանելով, թե ամուսինը պարտքեր ունի, պետք է մարի:
Մորաքույրն ուղարկել է գումարը, Հասմիկը, ըստ մեղադրանքի՝ այն օգտագործել է իր կարիքների համար և պարտքն էլ չի վերադարձրել՝ խաբեությամբ հափշտակել է:
Բացի այդ, 2012 թվականի մայիսի 18-ին Հասմիկը հեռախոսազրույց է ունեցել ամուսնու ազգականների հետ, 15 հազար դոլար խնդրել մեկ ամիս ժամանակով՝ պատճառաբանելով, թե ամուսնու եղբայրը այդքան պարտք ունի, և պարտատերերը սպառնում են իրեն ու իր երեխաներին: Հասմիկ Հարությունյանը, ըստ մեղադրանքի, ստացել և հափշտակել է12 հազար դոլար:
Եռադրվագ այս գործով ամբաստանյալին մեղադրանք է առաջադրված գողության ու խարդախությունների համար՝ ՀՀ քրեական օրենսգրքի 177 հոդվածի 3-րդ մասի 1-ին, 178 հոդվածի 3-րդ մասի 1-ին և 178 հոդվածի 2-րդ մասի 2-րդ կետերով:
Հասմիկ Հարությունյանի խափանման միջոցը ստորագրությունն է չհեռանալու մասին:
Դատական նիստը չկայացավ, որովհետև թարգմանչուհին դատարան չէր ներկայացրել համապատասխան լիազորագիրը:
Գործով թարգման պիտի մասնակցի, որովհետև տուժող տիկինը հայերեն գրավոր լեզվին չի տիրապետում:
