ԱՄՆ Դելավեր նահանգի ատենակալների դատարանը Apple ընկերությանը մեղավոր է ճանաչել iPhone շարքի սմարթֆոնների ստեղծման ընթացքում 3 արտոնագրերի խախտման մեջ: Այդ արտոնագրերը պատկանում են MobileMedia Ideas կազմակերպությանը, որի տերերն են Sony և Nokia ընկերությունները: Այս մասին հայտնում է RIA Novosti-ն՝ հղում անելով հայցվորի հաղորդագրությանը:
Վճռի հիման վրա հայցվորը կարող է Apple-ից փոխհատուցում պահանջել MobileMedia Idea-ին պատկանող տեխնոլոգիաների օգտագործման համար: Նշենք, որ հայցն Apple-ի դեմ ներկայացվել էր 2010 թվականին:
Սկզբում հայցում խոսվում էր iPhone սմարթֆոնների և iPod նվագարկիչների ստեղծման մեջ 10-ից ավելի արտոնագրերի խախտման մասին, սակայն դատական վարույթի ընթացքում դրանց թիվը նվազեցվել է 3-ի:
Այդ արտոնագրերից մեկը, որը Nokia ընկերությունը ստացել է 2002 թվականին, վերաբերում է ներկառուցված տեսախցիկով բջջային հեռախոսի կառուցվածքին:
Երկրորդը, որը Nokia-ն ստացել է 2001 թվականին, նկարագրում է տեխնոլոգիան, որը թույլ է տալիս բջջային հեռախոսին ավտոմատ կերպով անջատել այն համարից ստացվող զանգերը, որը նախապես կարգավորումներում նշում է օգտատերը:
Երրորդ արտոնագիրը, որը 2000 թվականին ստացել է Sony ընկերությունը, նկարագրում է ինտերֆեյսը, որը բջջային սարքի տիրոջը թույլ է տալիս կարգավորել ընթացիկ զանգի վիճակը, մասնավորապես՝ մեկի հետ խոսելիս մյուսին գծում պահելու ժամանակ:
Էլեկտրոնային սարքերի արտադրությամբ զբաղվող ընկերությունն ավելի քան 300 արտոնագիր ունի: