Ուրբաթ ԱՄՆ-ի նախագահ Բարաք Օբաման կհանդիպի ՄԱԿ-ում ԱՄՆ-ի մշտական ներկայացուցիչ Սյուզան Ռայսի հետ, ով արդեն հայտարարել է, որ չի պատրաստվում դառնալ պետքարտուղարի պաշտոնի թեկնածու:
Ինչպես հաղորդում է RIA Novosti-ն՝ վկայակոչելով Սպիտակ տան հաղորդագրությունը, հանդիպումը կկայանա տեղի ժամանակով ժամը 15.30-ին:
ՄԱԿ-ում ԱՄՆ-ի մշտական ներկայացուցիչ Սյուզան Ռայսը հրաժարվել է պետքարտուղարի պաշտոնից՝ գիտակցելով, որ իր թեկնածության հաստատումը սենատում փաստացիրոեն անհնար է: Այս մասին Ռայսը նամակով տեղեկացրել է Բարաք Օբամային:
Նշենք, որ Ռայսի հեղինակությունը լրջորեն տուժել է Բենղազիում ԱՄՆ հյուպատոսության վրա հարձակման մասին իր ելույթից հետո: Նա, մասնավորապես, հայտարարել էր, որ տեղի ունեցած ողբերգությունը ոչ թե ահաբեկչություն է, այլ ինքնաբուխ և ի սկզբանե խաղաղ բնույթ կրող բողոքի ակցիայի արդյունք: Ավելի ուշ ազգային հետախուզության տնօրենի գրասենյակը հայտարարել էր, որ տեղի ունեցածը ծրագրված ահաբեկչություն է եղել: Ներկայացուցիչների պալատի և Սենատի հանրապետականները հայտարարում են, որ ամեն ինչ անելու են, որպեսզի ՄԱԿ-ում զբաղեցրած պաշտոնը դառնա Ռայսի կարիերայի վերջնակետը:
Սյուզան Ռայսի՝ ԱՄՆ-ի պետքարտուղարի պաշտոնի համար պայքարից հրաժարավելուց հետո այդ պաշտոնում հավանական «առաջնային» թեկնածու է դարձել սենատի միջազգային կոմիտեի ղեկավար Ջոն Քերին:
