ՄԱԿ-ում ԱՄՆ ներկայացուցիչ Սյուզան Ռայսը խնդրել է չքննարկել իր հնարավոր նշանակման հարցը ԱՄՆ պետքարտուղարի պաշտոնում գործող պետքարտուղար Հիլարի Քլինթոնի հեռացնալուց հետո: Այս մասին նշված է Սպիտակ տան տարածած մամլո հաղորդագրության մեջ,- հայտնում է ITAR-TASS-ը:
Ինչպես նշվում է փաստաթղթում, Ռայսը Օբամայի նոր աշխատակազմում կշարունակի աշխատանքը ՄԱԿ-ում՝ որպես ԱՄՆ մշտական ներկայացուցիչ:
Ւնչպես հայտարարել է ԱՄՆ նախագահ Բարաք Օբաման, ինքը զրուցել է Ռայսի հետ ու «համաձայնել վերջինիս խնդրանքին՝ իր թեկնածությունը հանել ԱՄՆ պետքարտուղարի պաշտոնում հնարավոր նշանակման հարցում»: Օբամայի խոսքով՝ ինքը երախտապարտ է Ռայսին այն բանի համար, որ նա «կշարունակի ԱՄՆ դեսպանը լինել ՄԱԿ-ում» ու կմնա «կաբինետի առանցքային անդամը»:
«Ես խորապես ափսոսում եմ վերջին շաբաթներին Սյուզան Ռայսի վրա անարդար ու մոլորեցնող հարձակումների համար»,- ասել է Սպիտակ տան ղեկավարը:
Նա նկատի ուներ սուր քննադատությունը, որը ԱՄՆ Հանրապետական կուսակցության ներկայացուցիչների կողմից ԱՄՆ Կոնգրեսում տարվում էր Ռայսի հասցեին՝ կապված Լիբիայի Բենղազի քաղաքում ամերիկյան դիվանագիտական ներկայացուցչության վրա հարձակման ժամանակ Ռայսի արտահայտությունների հետ:
Օբամայի կարծիքով՝ Ռայսը պետական պաշտոնում անցկացրած 20 տարիների ընթացքում իրեն դրսևորել է որպես «չափազանց ընդունակ» մասնագետ, որը մեծ խանդավառությամբ է իրեն նվիրում գործին:
ԱՄՆ նախագահի համոզմամբ՝ ՄԱԿ-ի կենտրոնակայանում Ռայսը խաղում է «անփոխարինելի դեր Ամերիկայի հետաքրքրություններն առաջ մղելու հարցում»:
Օբամայի կարծիքով՝ Ռայսի որոշումը արտացոլում է նրա հակումը՝ ղեկավարվել միայն ազգային ու ոչ թե անձնական հետաքրքրություններով:
Ենթադրվում է, որ Հիլարի Քլինթոնն իր պաշտոնից կհեռանա հունվարի 21-ին՝ Օբամայի երդմնակալությունից հետո:
Ռայսի հետ մեկտեղ, Օբամայի նոր աշխատակազմում պետքարտուղարի հնարավոր թեկանածու էր համարվում դեմոկրատ սենատոր Ջոն Քերին: Ներկայում նա գլխավորում է Կոնգրեսի Վերին պալատի արտաքին հարաբերությունների հարցերով կոմիտեն:
