Այսօր Սպառողների ասոցիացիայի նախագահ Արմեն Պողոսյանը լրագրողների հետ հանդիպման ժամանակ անդրադարձավ ԱԺ «Ժառանգություն» խմբակցության պատգամավորների այն օրենսդրական նախաձեռնությանը, որի ընդունման դեպքում կտրուկ կսահմանափակվի Երևանում ուղևորատար միկրոավտոբուսների քանակը:
Հիշեցնենք, որ երեկ կառավարությունը, նախագծի հեղինակների մտահոգությունը արդարացված համարելով հանդերձ, դեմ արտահայտվեց օրենսդրական այս նախաձեռնությանը:
Ա. Պողոսյանը շեշտեց, որ Երևանի ուղևորատար միկրոավտոբուսների թիվը քաղաքի գլխավոր հատակագծի պահանջին համապատասխանելու համար չպետք է գերազանցի 19,2 տոկոսը, մինչդեռ այժմ ուղևորափոխադրման շուրջ 80 տոկոսն իրականացվում է միկրոավտոբուսներով։ Ընդ որում, Ա. Պողոսյանը անընդունելի համարեց կառավարության բոլոր բացատրությունները այս նախագիծը մերժելու վերաբերյալ:
Այն հավաստիացումները, թե կառավարությունն աշխատում է այս ուղղությամբ, ոչինչ չարժեն, քանի որ, ըստ նրա, 2007 թ. սկզբից մինչև 2010 թ. վերջն ընկած ժամանակահատվածում միկրոավտոբուսների կշիռը նվազել է ընդամենը 10 տոկոսային կետով` 90%-ից դառնալով 80%:
«Այսպես շարունակվելու դեպքում 19.2%-ին կհասնենք Քրիստոսի երկրորդ գալստյան ժամանակ»,- ասաց Ա. Պողոսյանը: Նրա խոսքով, քաղաքի օդը այդ ուղևորատար միկրոավտոբուսներն այնքան են աղտոտել, որ ինքն ուզում է իր գլխավորած հասարակական կազմակերպությունը` սպառողների ասոցիացիան վերանվանել սպանվողների ասոցիացիայի: