Այսօր քաղաքապետարանի ենթակայության դպրոցների ուսուցիչների ամենամյա օգոստոսյան խորհրդակցությանը քաղաքապետի տեղակալ Արամ Սուքիասյանը նախ դպրոցի տնօրեններին շնորհակալություն հայտնեց այս ընթացքում ուղարկված բոլոր հարցերի համար: Նա անդրադարձավ տնօրենների աշխատակազմին, այս կամ այն որակյալ կամ քստմնելի միջոցառմանը՝ առանձնապես տեղյակ չպահելով ուղղորդմանը:
«Այո, ճիշտ եք, դպրոցը գլխաքանակ չէ, վիրավորված եք, այո՛, ճիշտ եք, վիրավորական է, ուրախ եմ՝ արժանապատվորեն այսօրինակ մտքեր եք հնչեցնում, վստահեցնում եմ, որ փոխանցվելու է պատկան անձանց, մարմիններին, գերատեսչություններին, և շատ լավ եմ հասկանում, որ մի քանի տիրոջ ծառա եք դառնում, շատ լավ եմ հասկանում՝ վարչական շրջանի ղեկավարն իր հերթին, ԿԳ նախարարությունն իր հերթին, քաղաքապետարանն իր հերթին, կառավարությունը՝ իր, շատ լավ եմ հասկանում, բայց ուզում եմ կարողանանք ոգևորվել երեկվա բացի լրացմամբ, ոգևորվենք, որովհետև նախորդ տարի մենք այլ բան էինք քննարկում, դպրոցների հնաբնակներդ, խնդրում եմ ասեք, չորս-հինգ տարի առաջ ի՞նչ հարց էիք քննարկում, այսօր ի՞նչ հարցեր եք քննարկում, էսօր այնքան դրական երևույթներ կան, որ տեղ-տեղ հնարածին են դառնում թվարկված պրոբլեմները»,- ասաց նա՝ հավելելով, որ շատ է ուզում, որ մտավորականի կեցվածքով մնան դպրոցի տնօրենը, ուսուցչակազմը, իր եսով, իր լինելիությամբ, իր որակով, իր հատկանիշներով:
Նրա խոսքով՝ոչ մեկի համար հաճելի չէ մտնել դպրոց ուսուցչի նկատմամբ կասկած հայտնելով, ստուգում իրականացնել. «Մենք հանցագո՞րծ ենք փնտրում դպրոցում, դպրոցն է հա՞ մեր պրոբլեմը»: Նրա արտահայտած այս միտքը ոգևորություն առաջացրեց տնօրենների շրջանում:
Արամ Սուքիասյանի խոսքով՝ նույնքան էլ վիրավորական է փաստը արձանագրելը, որ ուսուցիչը իր կոչմանը հարիր չի դրսևորվում. «Ես՝ որպես քաղաքապետարանի աշխատող, մասամբ ձեր իրավապաշտպանը պետք է լինեմ, բայց այդ լիազորությունը դուք պետք է տաք, լեզվիս հնարավորության սահմանը ձեր հնարավորություններով պետք է տաք: Խնդրում եմ յուրաքանչյուրդ մնաք ձեր կոչմանը արժանապատիվ, հավատարիմ, զգոն, ոգևորվենք տարեցտարի առաջընթացով: Այսօր էլ գիտենք ուսուցչի արժեքը, ձեր կոչմանը հավատարիմ եղեք»,- ավելացրեց նա:
Ավելին՝ տեսանյութում:
