«Դեմ եմ» նախաձեռնության անդամ Գևորգ Գորգիսյանը տրամաբանական է համարում քառյակի կողմից կուտակային կենսաթոշակի մասին նոր օրենքը ՍԴ-ում վիճարկելը, քանի որ նոր օրենքը չի լուծել ոչ մի խնդիր, որն առկա էր նախորդում, ավելին՝ ավելացել են նոր խնդիրներ, այն է՝ տարբերություն դնել քաղաքացիների մեջ՝ ըստ իրենց աշխատավայրի։
«Շատ տրամաբանական է, որ դիմում են ՍԴ։ Դա ամեն դեպքում իրենց որոշումն է՝ անկախ «Դեմ եմ»-ի դիրքորոշումից»,- ասաց նա՝ անդարդառնալով վերջերս Բազե-2014-ին Սերժ Սարգսյանի՝ «Դեմ եմ» նախաձեռնության մասին հնչեցրած տեսակետին:
Այնուամենայնիվ, նա նշեց, որ իրենց պլաններն այնքան էլ չեն առնչվում ՍԴ-ի հետ. «Մենք մեր անելիքը գիտենք, մենք մեր անելիքը անելու ենք, անկախ նրանից՝ քառյակը ՍԴ կդիմի՞, թե՞ ոչ, կհաղթի՞, թե՞ ոչ»,- հավելեց Գևորգ Գորգիսյանը։
Նա հիշեցրեց, որ մինչև ՍԴ դիմելը Սերժ Սարգսյանը նորից գովում էր օրենքը և ասում էր, որ կողմ է օրենքին, որին, չնայած, 80 տոկոսը դեմ էր, և որը ՍԴ-ն ճանաչեց հակասահմանադրական:
Հիմա, Գևորգ Գորգիսյանի խոսքով, նորից հակասահմանադրական օրենք է ընդունվել, և եթե պետական աշխատողները պատրաստ լինեն պայքարելու, նրանց կողքին կլինեն:
«Բազմիցս եղել են ահազանգեր, երբ մանկավարժն ասել է, որ իրեն ճնշում են, բայց չգաք իմ դպրոց և չասեք իմ դպրոցի անունը: Այդ ձևով մենք ոչ մեկին չենք կարող օգնել, մարդիկ պետք է ոտքի կանգնեն, պետք է ձեռքը մեկնեն, որ մենք ձեռքը բռնենք, իսկ մարդիկ ոչինչ չեն ուզում անել և սպասում են օգնության»,- ասաց Գևորգ Գորգիսյանը:
«Դեմ եմ» նախաձեռնությունը դեռ չի քննարկել՝ արդյոք կմասնակցի՞ սեպտեմբերի 30-ին քառյակի հայտարարած հանրահավաքին: Նա նշեց, որ սեպտեմբերից սպասում են նոր թափ, նոր ակտիվություն. «Դեմ եմ»-ը պարապ նստած չէ, մտորումների, ծանրութեթև անելու փուլում է հիմա»:
Գևորգ Գորգիսյանը «Դեմ եմ»-ի հաղթանակներից և ձեռքբերումներից մեկը համարում է քաղաքացի դաստիրակելը, քանի որ քաղաքացիական մակարդակը շատ ցածր էր և շարունակում է այդպիսին մնալ:
«Դեմ եմ» նախաձեռնության անդամ Արմեն Աբրոյանն էլ նշեց, որ տրամաբանական է ՍԴ դիմելը, սակայն ՍԴ որոշումները թերի են իրականացվում, կրում են ցուցադրական բնույթ, և սա մտահոգիչ է:
Ավելին՝ տեսանյութում:
