The Wall Street Journal-ի ընթերցողները քննադատել են ՆԱՏՕ-ի գլխավոր քարտուղար Անդերս Ֆոգ Ռասմուսենի և Եվրոպայում դաշինքի զորքերի հրամանատար Ֆիլիպ Բրիդլավի հոդվածը, որում հիմնավորվել է Արևելյան Եվրոպայում դաշինքի ռազմական ներկայությունը մեծացնելու անհրաժեշտությունը:
Ռասմուսենն ու Բրիդլավն իրենց հոդվածում ասում են, որ Արևելյան Եվրոպայում անհրաժեշտ է տարածաշրջանի կյանքին ռազմական բլոկի ավելի շատ մասնակցություն «այնքան ժամանակ, որքան կպահանջվի»: Նրանք վստահ են, որ հետախուզական հնարավորությունները և պաշտպանական ծրագրերը վաղուց չեն նորացվել, իսկ Արևելյան Եվրոպայում ՆԱՏՕ-ի անձնակազմի մարզումները և զորավարժությունները չափազանց քիչ են:
Ռասմուսենն ու Բրիդլավը նշում են, որ ՆԱՏՕ-ն տարածաշրջանում պետք է պատրաստ լինի դիմադրելու ապագա սպառնալիքներին, «որտեղից էլ դրանք գան»: Այդ կապակցությամբ, ինչպես գրում են դաշինքի ներկայացուցիչները, անհրաժեշտ է ոչ միայն բարձրացնել արագ արձագանքման ուժերի պատրաստականությունը, այլև ավելացնել Արևելյան Եվրոպայում տեղակայված ռազմական տեխնիկայի և սարքավորումների թիվը:
Սակայն ընթերցողները համամիտ չեն ՆԱՏՕ-ի պաշտոնական անձանց եզրակացությունների հետ: Հոդվածի մեկնաբանություններում մարդիկ նշում են, որ հենց ռազմական բլոկն է պատասխանատու, որ վերջին տասնամյակներին աշխարհն ավելի անվտանգ չի դարձել:
