Ամերիկացի կատակերգու դերասան Ռոբին Ուիլյամսի ինքնասպանությունը նախապես ծրագրված չի եղել, գրում է TMZ-ը: Բանն այն է, որ դերասանի մտերիմներից մեկն ասել է, որ դրանից մեկ օր առաջ իրենք ապագայի ծրագրերից են խոսել: Նրա խոսքով՝ «Ուիլյամսն ամբողջությամբ տարվել էր զրույցով» և բազմաթիվ հստակեցնող հարցեր է տվել, ինչը նման չէ մարդուն, որը որոշել է մոտ ապագայում վերջ տալ կյանքին:
Աղբյուրը հստակեցրել է, որ զրույցում ինքնասպանության մասին խոսք անգամ չի եղել: «Ռոբինը տխուր էր, սակայն սովորականից ոչ ավելի: Նրա մոտ, ինչպեսև շատ կատակերգուների, կյանքի սև գիծը բավականին ձգձգված էր»:
Դերասանի մտերիմ ընկեր Ռոբ Շնայդերի խոսքով` ինքնասպանության կարող էին հասցնել Պարկինսոնի հիվանդության դեմ Ռոբինի ընդունած դեղահաբերը. հիվանդություն, որ կատակերգուի մոտ վաղ շրջանում էր: Ըստ Շնայդերի՝ այդ հաբերը սուիցիդային տրամադրություններ են առաջացնում: Փորձագետներն էլ հաստատում են, որ Պարկինսոնի հիվանդությունը կարող է ուժգնացնել ընկճախտը:
