«Տանկային բիաթլոն-2014» մրցույթի եզրափակիչ փուլում երկրորդ տեղը զբաղեցրած հայ տանկիստներին այսօր «Զվարթնոց» օդանավակայանում դիմավորեցին պաշտպանության նախարար Սեյրան Օհանյանը, ՀՀ զինված ուժերի գլխավոր շտաբի պետ, գեներալ-գնդապետ Յուրի Խաչատուրովը, երիտասարդական և հասարակական կազմակերպությունների ներկայացուցիչներ, տանկիստների հարազատները:
Հայաստան վերադարձող տանկիստները ոգևորված էին և լիահույս, որ հաջորդ տարի առաջին տեղում կլինեն: Նրանց ղեկավարը՝ Ժիրայր Պողոսյանը, լրագրողների հետ զրույցում ասաց, որ կային դժվարություններ, բայց մեր տանկիստները դրանք կարողացել են հաղթահարել: Վերջիններս, ի դեպ, մյուս երկրների մասնակիցների հետ համեմատ ավելի երիտասարդ են, ժամկետային զինծառայողներ են:
Տանկիստ Գագիկ Գևորգյանը «Առաջին լրատվական»-ի հետ զրույցում ասաց, որ մրցույթը թեպետ դժվար էր, բայց հաղթանակը՝ սպասելի:
Տեղեկացնենք նաև, որ Տանկային բիաթլոնի աշխարհի առաջնությունում երկրորդ տեղը գրաված Հայաստանի հավաքականը Т-90 նոր տանկ է նվեր ստացել:
Հիշեցնենք, որ Ռուսաստանի Դաշնությունում` մերձմոսկովյան «Ալաբինո» ուսումնական զորավարժարանում, այսօր` օգոստոսի 16-ին, կայացել է «Տանկային բիաթլոն-2014» միջազգային մրցումների եզրափակիչ փուլը: «Տանկային բիաթլոն-2014»-ի եզրափակիչ փուլում մրցում էին նախորդ օրերի արդյունքներով 1-ինից 4-րդ տեղեր գրաված երկրների` Ռուսաստանի, Ղազախստանի, Չինաստանի և Հայաստանի զինված ուժերի տանկային անձնակազմերը: Եզրափակիչ փուլի արդյունքներով հայ տանկիստները, արձանագրելով բարձր ցուցանիշներ, գրավել են երկրորդ տեղը` զիջելով Ռուսաստանի հավաքականին: 3-րդ և 4-րդ տեղերը զբաղեցրել են Չինաստանի ու Ղազախստանի տանկային անձնակազմերը:
Առավել մանրամասն՝ մեր տեսանյութում:
