ԱՄՆ-ում նավթի արդյունահանումը հուլիսին հասել է 1987 թվականի ապրիլից առավելագույն ամսական մակարդակի և կազմել օրական 8.5 մլն բարել: Այս մասին հայտնում է ԱՄՆ էներգետիկայի նախարարության էներգետիկ տեղեկատվության վարչությունը՝ փոխանցում է RIA Novosti-ն:
Գերատեսչությունը բարձրացրել է երկրում նավթի արդյունահանման տարեկան կանխատեսումը՝ հասցնելով օրական 8.5 մլն բարելի՝ նախկինում սպասվող 8.42 մլն բարելի փոխարեն: 2015-ին սպասվում է, որ ԱՄՆ-ում կարդյունահանվի օրական 9.3 մլն բարել՝ 1972 թվականից նավթի ամենաբարձր մակարդակը:
Շնորհիվ ներքին արդյունահանման աճի՝ ԱՄՆ-ը շարունակում է նվազեցնել ներկրվող նավթի մասնաբաժինը: Գերատեսչության կանխատեսմամբ՝ հաջորդ տարվա արդյունքներով ներկրված նավթի ու նավթամթերքի սպառումը կկազմի 22 տոկոս՝ 2013-ի 33 տոկոսի և 2005-ի 60 տոկոսի դիմաց: Այսպիսով՝ 2015-ին ԱՄՆ-ը կգնի վերջին 45 տարվա ամենափոքր ծավալի նավթն ու նավթամթերքը:
