Դեկտեմբերի 3-ին Աժ ՀՀԿ-ական պատգամավոր Դավիթ Հարությունյանը կոնգրեսական պատգամավոր Գագիկ Ջհանգիրյանին առաջարկեց մարտի 1-ին սպանվածների և վիրավորների գործերով զբաղվող նոր հանձնաժողովի ստեղծման նրա հեղինակած նախագծի քվեարկությունը հետաձգել մեկ տարով, և Գագիկ Ջհանգիրյանը համաձայնեց: Ըստ «Հրապարակ»-ի` ՀԱԿ պատգամավորի պահվածքը զարմացրել է մարտի մեկին զոհվածների հարազատներին, և նրանք շտապել են Կոնգրես` բացատրություններ ստանալու, ու կարծես թե Ջհանգիրյանին հաջողվել է համոզել ծնողներին, որ մարտի մեկի նոր հանձնաժողով ստեղծելու այլ տարբերակ չկար:
«Մենք առաջին օրը շատ վատ եղանք` իմանալով, որ Հարությունյանը համոզել է Ջհանգիրյանին, բայց հետո, երբ հանդիպեցինք Ջհանգիրյանի հետ, նա ասաց, որ, միևնույն է, հանրապետականները դեմ էին քվեարկելու: Իսկ այս ձևով նրանք գոնե խոստացել են, որ հարցին կողմ են քվեարկելու»,- ասում է Տիգրան Խաչատրյանի մայր Ալլա Հովհաննիսյանը: Նա չի ընդունում մամուլում տեղ գտած կարծիքը, թե ՀԱԿ-ը գործարքի մեջ է մտել իշխանությունների հետ: «Ուղղակի իրենք ուրիշ շանս չունեին: Ավելի լավ է մի քանի ամիս հետո ունենալ ինչ-որ արդյունք, քան ոչինչ` հիմա: Բայց համոզված եմ, որ կոալիցիան դեմ է քվեարկելու կամ գտնելու է մի միջոց իր խոսքից հետ կանգնելու»,- ասաց Ալլա Հովհաննիսյանը:
Մինչ այսօր կոալիցիան մարտի մեկից տուժածների պահանջների օգտին ոչ մի գործնական քայլ չի արել: «Խոստացան, որ նոր թափ կտան մարտի մեկի գործով քննությանը, չտվեցին: Իսկ երբ մեր իսկ ծնողների մեղքով մեր պայքարում մի քիչ դադար տվեցին, նրանք առիթից օգտվեցին և Էդիկ Մինասյանի դասագիրքը տպեցին, որով թքեցին մեր հոգու խորքը, մեր վշտի վրա»,- ասաց Ալլա Հովհաննիսյանը: Նա նաև հայտնեց, որ զոհվածների ծնողները շարունակելու են ակցիաներն ընդդեմ համալսարանի ռեկտորի, այդ դասագրքի հեղինակների, որոնք իրավունք չունեին չորսուկես տարի նախաքննության մեջ գտնվող սպանության գործով վերջնական գնահատականներ և վիրավորական արտահայտություններ թույլ տալ զոհվածների հասցեին:
Թերթը հիշեցնում է, որ լույս է տեսել «Հայոց պատմություն» բուհական դասագիրքը, որում մարտի 1-ի դեպքերի նկարագրությունը խեղաթյուրված է: Համալսարանում տեղի ունեցած հանդիպման ժամանակ Էդիկ Մինասյանի տեղակալը հարցրել է Ալլա Հովհաննիսյանին, թե նա որտեղի՞ց է վերցրել, որ իր որդին սպանվել է արգելված զենքից: