Ռուսաստանի նախագահ Վլադիմիր Պուտինը Էռնեստո Չե Գևարա է դարձել «մարտաֆիլմերի բազմաչարչար հերոսներ» Միկի Ռուրկի և Սթիվեն Սիգալի համար: Այս մասին գրում է Foreign Policy-ն:
Ավելի վաղ հաղորդվել էր, որ Ռուրկը Մոսկվայում գնել է Պուտինի պատկերով մարզաշապիկ, իսկ Սիգալը համերգ տվել Սևաստոպոլում բայք շուոի ժամանակ:
Պարբերականի կարծիքով՝ նրանք երկուսն էլ հիշեցնում են միջնակարգ դպրոցի աշակերտների, ովքեր դասի են գալիս կուբայական հեղափոխության կոմանդանտե պատկերով մարզաշապիկով: «Այդ տղամարդիկ կուռք փնտրող ապստամբներ են»,- ասվում է հոդվածում:
Իր հերթին, New Republic պարբերականը կատակում է՝ գրելով, որ Ռուրկի և Սիգալի պատճառով Պուտինի աջակցությունը սկսել է հիշեցնել «Անզսպելիների» նոր շարունակությունը: Բացի դրանից՝ հոդվածում նշվում է, որ ռուս նախագահով հիանալն այդ դերասանների միակ ընդհանուր գիծը չէ: Նրանք ակտիվորեն աջակցում են կենդանիների իրավունքների պաշտպանությամբ զբաղվող PETA կազմակերպությանը:
