Ամառվան սպասում են շատերը, իսկ այս սեզոնին շատացող խնդիրների մասին մտածում են ոչ բոլորը: Այս սեզոնին ամենահաճախ հանդիպող խնդիրներից են սննդային թունավորումներն ու աղիքային հիվանդությունները:
Այսպիսի խնդրի սրացումը ամառվա սեզոնին պայմանավորված է նրանով, որ ամռանը վիրուսը՝ այս հիվանդության հարուցիչը, ավելի հեշտությամբ է հայտնվում ու պահպանվում սննդի ու խմելու ջրի վրա:
Տարբերակելու համար պետք է նշել, որ այս հիվանդությունն ընթանում է՝ ուղեկցվելով որովայնի ու ստամոքսի հատվածում կծկանքային բնույթի ցավով, փխսման երևույթներով, նաև լուծի առկայությամբ: Սակայն այս նշանները միշտ չէ, որ հանդես են գալիս միաժամանակ:
0Նման տեսակի խնդիրներ հանդիպում են ինչպես մեծահասակների, այնպես էլ երեխաների շրջանում: Երեխաների մոտ ախտահարումը հիմնականում ռոտավիրուսներն են: Դրանք ունենում են առավել ծանր ընթացք, և ջրազրկումն էլ առավել շուտ է զարգանում: Այդ իսկ պատճառով երեխաների դեպքում առավել շուտ պետք է դիմել բժշկի:
Հարց է առաջանում. եթե բոլոր վերը նշված ախտանշանները խոսում են աղիքային հիվանդության մասին, ապա ո՞րն է սննդային թունավորումը, և ինչո՞ւ է այն առաջանում:
Գոյություն ունի սննդային թունավորման 2 տեսակ՝ մանրէային և քիմիական: Քիմիական թունավորումներ են առաջանում բացառապես այն դեպքերում, երբ սննդում առկա է մետաղի մեծ քանակ: Սննդային մանրէային թունավորումներ առաջանում են ապխտած մսի, երշիկի, ձկնեղենի, կաթնամթերքի, ձվի, տնային պայմաններում պատրաստված պահածոների ընդունման արդյունքում։ Այսպիսի թունավորումները զարգանում են արագ և հյուծում են հիվանդին: Սննդային թունավորումների ժամանակ հանդիպող ախտանշանները գրեթե նույնն են:
Մենք՝ հայերս, ամռան շրջանում սիրում ենք հանգստանալ բնության գրկում, և հանգիստն էլ պարտադիր կերպով լրացնում են ավանդական խորովածն ու ձմերուկը: Ինչպես նշում է մասնագետը, շոգ եղանակին նման սնունդը ցուցված չէ, իսկ եթե այնուհանդերձ որոշել եք սնվել այդկերպ, պետք է հնարավորինս անյուղ միս ընտրել: