Մեծանում է Ղարաբաղյան հակամարտության միջազգայնացման վտանգը: «Առաջին լրատվական»-ի հետ զրույցում այս մասին ասաց ՌՊՀՀ տարածաշրջանի և արտաքին քաղաքականության ամբիոնի դոցենտ, Միջազգային հարաբերությունների ռուսական խորհրդի փորձագետ, պատմական գիտությունների թեկնածու, սյունակագիր Սերգեյ Մարկեդոնովը՝ անդրադառնալով հայ-ադրբեջանական սահմանին ու ղարաբաղա-ադրբեջանական հակամարտ զորքերի շփման գծում աճող լարվածությանն ու դրա հնարավոր հետևանքներին:
Նա խիստ կասկածում է, որ այս փուլում պետք է խոսել լայնածավալ ռազմական գործողությունների մասին, քանի որ իրականում հրադադարի ռեժիմի խախտման դեպքերը բավականին հաճախակի բնույթ են կրել ողջ հրադադարի ընթացքում:
Ըստ նրա՝ ցավոք սրտի, վերջին երկու տարվա ընթացքում այդ դեպքերը շատ են ոչ միայն ղարաբաղա-ադրբեջանական հակամարտ զորքերի շփման գծում, այլև հայ-ադրբեջանական միջկառավարական սահմանին, որը մի քանի անգամ ավելի վտանգավոր է: Մարկեդոնովի կարծիքով՝ սա վտանգավոր է այն առումով, որ վեճը կոնկրետ տարածքների շուրջ վերաճում է հայ-ադրբեջանական հակամարտության և դիմակայության, հետևաբար նաև մեծանում է հակամարտության միջազգայնացման վտանգը, որի ներքո կարելի է հասկանալ շատ ավելի ընդարձակ գործընթացներ, այդ թվում՝ հետխորհրդային տարածքում ռազմաքաղաքական ինտեգրացիայի ճգնաժամ: Ռուսաստանցի հեղինակավոր վերլուծաբանի համոզմամբ՝ հայ-ադրբեջանական սահմանին տիրող լարվածության հետագա սրումը մի շարք լուրջ մարտահրավերներ է առաջ բերում, ի դեպ՝ ոչ միայն Բաքվի ու Երևանի, այլ նաև նրանց հարևան երկրների, ՀԱՊԿ-ի, եվրասիական պրոյեկտների ու արտաքին խաղացողների համար:
«Լարվածությունը վտանգավոր է այն առումով, որ այն տեղի է ունենում հետխորհրդային տարածքի վերաձևավորման ընթացքում Արևմուտքի և Ռուսաստանի միջև բավականին խորը դիմակայության շրջանում: Իսկ այդ դիմակայությունը և մոտեցումների տարբերությունը վերաբերում են ոչ միայն առանձին վերցրած մի երկրի, այլև ողջ հետխորհրդային տարածաշրջանին: ԱՄՆ-ը, Ֆրանսիան և Ռուսաստանը հանդիսանում են ԵԱՀԿ Մինսկի խմբի համանախագահ երկրներ, իսկ ուկրաինական ճգնաժամը փաստորեն արգելափակել է մյուս բոլոր ուղղություններով նրանց արդյունավետ աշխատանքը: Բացակայում է ամբողջական դիվանագիտական երկխոսությունը: Ուստի հայ-ադրբեջանական հակամարտության գոտում բռնության լարումը դառնում է միջնորդների կառուցողականության և արդյունավետության փորձություն: Ամբողջական հաղորդակցության բացակայությունը սադրում է նոր միջադեպեր»,- ասաց Սերգեյ Մարկեդոնովը՝ հավելելով, որ ձեռնպահ կմնա միանշանակ գնահատականներից՝ գոնե մինչև Ալիև-Սարգսյան հնարավոր հանդիպումը:
Հարցին՝ հնարավո՞ր է Սոչիում կայանալիք հանդիպումն ավարտվի հակամարտության գոտում ռուս խաղաղապահների տեղակայման մասին որոշմամբ, փորձագետը պատասխանեց, որ Ռուսաստանը, որն այսօր զբաղված է ավելի մասշտաբային ծրագրերով, չի ցանկանում, որ ԼՂ հակամարտությունն այս փուլում դուրս գա ափերից:
«Ես չեմ կարծում, որ խաղաղապահներ կտեղակայվեն, չեմ կարծում, թե կրիտիկական մեծամասնությունը դրան կողմ կարտահայտվի»,- ասաց ռուսաստանցի հեղինակավոր վերլուծաբան Սերգեյ Մարկեդոնովը:
