Լիբանանի զինված ուժերը կձեռնարկեն բոլոր միջոցները, «որպեսզի պահպանեն երկրի միասնականությունը, պաշտպանեն ինքնավարությունը և ապահովեն քաղաքացիների անվտանգությունը»: Այս մասին օգոստոսի 3-ին Բեյրութում տեղի ունեցած մամլո կոնֆերանսին հայտարարել է լիբանանյան բանակի հրամանատար Ժան Կախվաջին, փոխանցում է ITAR-TASS-ը:
Նրա խոսքով՝ «զորքերը պատրաստ են հակազդելու տաքֆիրիստ ծայրահեղականների խմբավորումների դեմ, որոնք փորձում եմ օգտագործել Էրսալում ձևավորված իրադրությունը»:
Կախվաջին հայտնել է, որ Սիրիայի հետ սահմանամերձ Էրսալ քաղաքը զավթած «Ջեբհատ ան-Նուսրիի» հանցախմբերի հետ բախումների ժամանակ 10 զինծառայող է զոհվել, 25-ը վիրավորվել են, այդ թվում՝ նաև 4 սպա: 16 մարդ անհայտ կորել է: Բացառված չէ, որ նրանք գտնվում են գրոհայինների ձեռքում:
Բանակի հրամանատարը լիբանանյան քաղաքական գործիչներին նախազգուշացրել է, որ չպետք է թույլ տալ, որ սիրիացի փախստականների ճամբարները «ահաբեկիչների համար նավահանգիստներ» ծառայեն:
«Մենք դեռ երկու տարի առաջ ասել ենք, որ օտարերկրացիները ժամանում են Լիբանան ու գնում այդ ճամբարները»,- ասել է գեներալը: Ընդ որում՝ նա ընդգծել է, որ «որոշակի ուժեր փորձում են սիրիա-լիբանանյան սահմանին նույն սցենարը խաղալ, ինչն իրականացվել է Սիրիայի և Իրաքի սահմանին:
Կախվաջին հայտնել է նաև, որ շաբաթ օրը զինվորականների կողմից ձերբակալված «Ջեբհատ ան-Նուսրիի» հրամանատար Իմադ Ահմեդ Ջումման լիբանանյան զորքերի դեմ խոշոր ահաբեկչական ակտ էր կազմակերպել: «Նրա ձերբակալությունը տապալել է հանցավոր ծրագրեր»,- նշել է գեներալը:
Տեղեկատվության համաձայն՝ Էրսալի շրջանում շարունակվում են բանակային նոր ստորաբաժանումներ հավաքվել: Մոջահեդները օգոստոսի 3-ին հանկարծակի հարձակվել են բանակային Վադի-էլ-Հոսն և Էլ-Լյաբվե անցակետերի, ինչպես նաև Վադի-Ռաայանե զորանոցի վրա: Դրանից բացի՝ նրանք կրակ են բացել ավտոշարասյան վրա, որն արտահանում էր քաղաքից տեղափոխվող խաղաղ բնակիչների: Մեկ մարդ զոհվել է, կան վիրավորներ:
