ԱՄՆ-ը կասեցրել է մի շարք պատժամիջոցների գործողությունը, որոնք ավելի վաղ սահմանվել էին Իրանի նկատմամբ: Այս որոշումն ընդունվել է շնորհիվ միջուկային ծրագրի շուրջ Թեհրանի և «Վեցյակի» միջև բանակցություններում ձեռք բերված առաջընթացի: Համապատասխան փաստաթղթերը հրապարակվել է ԱՄՆ դաշնային ռեգիստրում՝ գրում է ITAR-TASS-ը:
Ժամանակավորապես հանվել է Իրանից նավթաքիմիական մթերք գնելու արգելքը, մասնավորապես՝ Իրանի ազգային նավթային և Իրանի ազգային տանկերային ընկերություններից: Արգելքը, ինչպես նախկինում, տարածվում է առանձին ընկերությունների վրա, որոնք ներգրավված են ամերիկյան ֆինանսների նախարարության ցուցակում:
Դրանից բացի, ամերիկացիներին կրկին թույլատրել են Իրանին դետալներ մատակարարել քաղաքացիական ինքնաթիռների վերանորոգման համար, մասնավորապես՝ գործարքներ կնքել Iran Аir-ի հետ:
Ընդ որում, փաստաթղթերում ընդգծվում է, որ ընդունված որոշումները տարածվում են միայն 2014թ. հունվարի 20-ից նոյեմբերի 24-ը ընկած ժամանակահատվածների վրա:
Ավելի վաղ Իրանի ԱԳ նախարարի տեղակալ Աբաս Արագչին հայտարարել էր, որ Թեհրանը չի համաձայնի պատժամիջոցների մասամբ կասեցմանը և կպնդի, որ դրանք միաժամանակ և ամբողջությամբ կասեցվեն:
«Նրանք գերադասում են սկզբում կասեցնել պատժամիջոցները, որից հետո դրանք չեղյալ հայտարարել,- բացատրել է դիվանագետը:- Սակայն մենք պատրաստ չենք ընդունել նման դիրքորոշումը»:
«Եթե նրանք Իրանի կողմից սպասում անշրջելի քայլերի են, ապա իրենք նույնպես համանման քայլեր պետք է կատարեն,- նշել է Արագչին:- Իսկ պատժամիջոցները պետք է հանվեն ամբողջովին և միանգամից»:
