ԱՄՆ-ում սկանդալ է հասունացել այն բանից հետո, երբ NY Post-ի լուսանկարիչը նկարել է ռելսերի վրա ընկած տարեց տղամարդուն՝ նրան օգնություն ցուցաբերելու փոխարեն: Այս մասին տեղեկացնում է Life News-ը:
Ողբերգական դեպքը տեղի է ունեցել դեկտեմբերի 3-ին` Մանհեթենի մետրոյի կայարանում:
Քվինսի բնակիչ Կի Սուկ Խանը վիճել է ալկոհոլ օգտագործած մի տղամարդու հետ, որին վիճաբանության ընթացքում հրել է դեպի ռելսերը: 58-ամյա տղամարդը փորձել է դուրս գալ հարթակի վրա, սակայն առանց կողմնակի օգնության չի կարողացել:
Վեճին ականատես է եղել մի քանի մարդ, այդ թվում՝ New York Post թերթի լուսանկարիչ Ումար Աբբասին: Մարդուն օգնության ձեռք մեկնելու փոխարեն` լուսանկարիչը սենսացիայի հետևից ընկած` որոշել է լուսանկարներ անել՝ անտեսելով մոտեցող գնացքը: Դրա հետևանքով Կի Սուկ Խանը զոհվել է` մնալով գնացքի տակ:
Սկանդալը հասունացել է այն բանից հետո, երբ տղամարդու մահը պատկերող լուսանկարները հայտնվել են New York Post-ի համարի առաջին էջում:
Ընթերցողներին ոչ միայն վրդովեցրել էր լուսանկարչի վարքը, որի անգործությունը դարձել էր տղամարդու մահվան պատճառ, այլև հենց արված լուսանկարների հրապարակումը ու դրանց մեկնաբանությունը: Պարբերականը դրանք «սենսացիոն» էր որակել, իսկ տղամարդուն՝ «դատապարտված»:
Համացանցում արդեն հնչում են թերթը բոյկոտելու կոչեր:
