Ֆլեթչերի իրավունքի և դիվանագիտության դպրոցի շրջանավարտ Լուսինե Մարտիրոսյանը, որը ներկա էր «Լույս» հիմնադրամի կազմակերպած «Հայաստանը որպես հնարավորությունների երկիր» խորագրով հանդիպմանը, ՀՀ նախագահի աշխատակազմի ղեկավար Վիգեն Սարգսյանին հարց ուղղեց. «Հայաստանում ոչ միայն «Լույս»-ի, այլ նաև այլ միջոցներով աշխարհի լավագույն բուհերում սովորած և ավարտած մարդկանց մեծ ռեսուրս կա, և կարծում եմ, որ դրանք նպատակային չեն օգտագործվում: Ես առաջարկում եմ ստեղծել մասնագիտական և մարդկային ռեսուրսների մի պորտալ, որը հասանելի լինի Հայաստանի բոլոր պետական մարմիններին. հենց այդ շտեմարանից կարող են նրանք ընտրել»,-ասաց նա:
Վիգեն Սարգսյանը նշեց, որ նման ծրագրերը մշակվում են, այդ թվում՝ նախագահական գրադարանը, պետական մի քանի ծրագրեր կան, հիմնում են նաև կարիերայի կենտրոն, որտեղ հանրային կառավարում են ուսուցանելու:
«Կարևոր է հիշել, որ CV-ին այդ շտեմարանին ուղարկելը և հետ կանգ առնելը բավարար չէ: Յուրաքանչյուրս պետք է կառուցենք այն աշխատանքը, որն ուզում ենք, դատաբազայում հայտնվելը և CV ներկայացնելը ընդամենը կոմպրոմիս է, որ ինքդ քեզ հետ ես գնում, և մարդիկ հույս ունեն, որ կզանգեն կասեն` բարև, ինչո՞ւ չես գալիս դառնաս նախագահի աշխատակազմի ղեկավար. այդպես չի լինում, դու դրան չես կարող սպասել: Նորից ուզում եմ խորհուրդ տալ բոլորիդ, երբ ուսում եք ստանում, զուգահեռ մտածեք նաև կարիերայի մասին»,- հավելեց Վիգեն Սարգսյանը:
Լուսինե Մարտիրոսյանը «Առաջին լրատվական»-ի հետ զրույցում նշեց, որ խնդիրը, որն ինքը բարձրացրեց, ոչ թե անհատական, այլ համընդհանուր խնդիր է, որին շատ շրջանավարտներ են բախվում. «Պետական համակարգը և ընդհանրապես տնտեսությունը դեռևս պատրաստ չէ ընդունել արևմտյան կրթություն ստացած երիտասարդների»,- ասաց նա՝ հավելելով, որ պետք է հաշվի առնել, թե ղեկավար օղակներում ինչ տիպի մարդիկ են աշխատում:
Ավելին՝ տեսանյութում:
