Մոտ մեկ ամիս առաջ «Հրապարակ»-ը գրել էր, որ Մեղրիում շրջանառվող լուրերով, հոկտեմբերի վերջին Արմավիրի քաղաքապետ Ռուբեն Խլղաթյանը` Ռուբեն Հայրապետյանի խնամին, մի խումբ զինվորականների հետ որս է արել և Կարմիր գրքում գրանցված քարայծ որսացել: Գրել էր նաև, որ Խլղաթյանը որսի սիրահար է և հաճախ է գնում Մեղրի` որսի: Երեկ պարզվեց, որ թերթի հրապարակման հիման վրա ոստիկանության Մեղրիի բաժնում նյութեր են նախապատրաստվում: Գործով զբաղվող քննիչը երեկ գրություն էր ուղարկել և խնդրել տրամադրել ինֆորմացիայի աղբյուրը կամ տեղեկություն այն անձանց մասին, որոնցից ստացվել է տեղեկատվությունը:
Թերևս ոստիկանության Մեղրիի բաժնում տեղյակ չեն «Զանգվածային լրատվության մասին» օրենքի 5-րդ հոդվածի մասին կամ էլ մոռանում են, որ հանցագործություն բացահայտելն իրենց գործառույթն է. ինչպես մերը գրելն է ու խնդրի մասին բարձրաձայնելը: «Հրապարակ»-ը պարզեց նաև, որ Խլղաթյանը բացատրություն է տվել և հերքել քարայծի որսը, ինչը և ենթադրելի էր: Ոչինչ` անգամ հարցաքննությունն արդեն զսպող դեր կխաղա, և որսասեր պաշտոնյաներն ու օլիգարխները կհասկանան, որ Կարմիր գրքում գրանցված կենդանի խփելն անմեղ բան չէ. մի օր դրա համար կարող են պատասխան տալ:
