Մայիսի 9-ից Ստեփանակերտի օդանավակայանը պատրաստ կլինի շահագործման, և կիրականացվի Երևան-Ստեփանակերտ չվերթը: Ադրբեջանական կողմն արդեն իսկ հայտարարել է, որ իրենք իրավունք ունեն վերացնելու այն բոլոր ինքնաթիռները, որոնք վայրէջք կկատարեն Ստեփանակերտի օդանավակայանում: Նշենք, որ, նախնական տվյալներով, Երևան-Ստեփանակերտ տոմսն արժենալու է 15-20 հազար դրամ:
Քաղաքագետ Հրանտ Մելիք-Շահնազարյանի գնահատմամբ, մենք գործ ունենք պետական ահաբեկչության հետ, և պարտադիր չէ, որ լինի հենց ահաբեկչական ակտ` վախեցնելը և նման հայտարարություններ անելը ևս ինքնին ահաբեկչություն է, և հայկական կողմը շատ հանգիստ կարող է արդեն իսկ խոսել տեղեկատվական ահաբեկչության մասին:
«Իրականում նման քայլի գնալը Ադրբեջանի մենթալիտետին խորթ չէ: Ցավոք, մեր անկախության պատմության մեջ նման փորձ ունեցել ենք` 1992 թ. մայիսի 9-ին Ստեփանակերտից Երևան թռչող ՅԱԿ 40 քաղաքացիական ինքնաթիռը ենթարկվեց հարձակման, և միայն օդաչուների վարպետության շնորհիվ հնարավոր եղավ ինքնաթիռը իջեցնել»,- լրագրողների հետ հանդիպման ժամանակ նշեց քաղաքագետը:
Ռազմական փորձագետ Արծրուն Հովհաննիսյանն էլ հավելեց, որ այս չվերթները լուրջ տնտեսական խթան կարող են լինել Արցախի համար, և ադրբեջանական ագրեսիան պայմանավորված է նաև այդ հանգամանքով. «Լավ հասկանալով, թե այդ չվերթները ինչ դրական գործոն կարող են լինել Արցախի տնտեսական զարգացման համար, Ադրբեջանը փորձում է նմանատիպ սադրանքների միջոցով վախեցնել, ահաբեկել, թույլ չտալ, որպեսզի Արցախը ունենա զարգանալու ևս մեկ հնարավորություն»:
