Առանց աջ ձեռքի ծնված 6-ամյա Ալեքս Պրինգի հայրը բեռնատարի վարորդ է: Ծնված օրից ծնողները երեխայի համար պրոթեզ էին ցանկանում գնել, սակայն նրանց բժշկական ապահովագրությունը չէր փակում արհեստական ձեռքի արժեքը: Ընտանիքը չի հուսահատվել և որոշել է դիմել առցանց e-NABLE բարեգործական կազմակերպությանը: Խնդրանքին առաջինը արձագանքել են Կենտրոնական Ֆլորիդայի համալսարանի աերոտիեզերական ֆակուլտետի մասնագետները, ովքեր սկսել են նախագծի իրագործումը:
«Մենք խնդրել ենք նրանց մեր տղայի համար պատրաստել ամենասովորական պրոթեզ, սակայն մեզ պատասխանեցին, որ իրենք ավելի շատ բան կարող են անել»,- պատմել է երեխայի մայրը:
6 շաբաթվա ընթացքում ինժեներների թիմը համացանցից ներբեռնված մոդելների, 3-D տպիչի և այլ տարրերի օգնությամբ՝ ընդհանուր առմամբ 350 դոլար արժողությամբ, Ալեքսի համար պատրաստել են շատ լավ գործածվող պրոթեզ: Հիմա փոքրիկը ինքնուրույն կարող է ծալել այն, ինչպես նաև վերցնել ու տեղափոխել իրեր:
«Գաղափարը կայանում է նրանում, որ երեխան ձեռքի վերին մկանների օգնությամբ կարողանա ծալել ու բացել պրոթեզի տարբեր հատվածներ: Նա հասկացել է, թե ինչպես է այն հաշված րոպեների ընթացքում աշխատում»,- հայտարարել է նախագծի մասնակիցներից մեկը՝ Մատեո Ալվարեսը:
