Այսօր Մալիի կառավարությունը Բուրկիանա-Ֆասոյի միջնորդությամբ ուղիղ բանակցություններ կվարի անջատողականների և իսլամիստների հետ: Այս մասին հաղորդում է Reuters գործակալությունը:
Ինչպես հաղորդել է Մալիի արտգործնախարար Թիման Կուլիբալին, կենտրոնական կառավարությունը չի համաձայնի Մալիի հյուսիսում անկախ պետություն ստեղծել կամ ներմուծել շարիաթի օրենքներ, ինչը պնդում է «Անսար Դին» («Իսլամի պաշտպաններ») խմբավորումը:
Փորձագետների կարծիքով՝ բանակցությունների ժամանակ չի հաջողվի զգալի առաջընթացի հասնել, քանի որ կողմերը չեն ցանկանում փոխզիջման գնալ:
Հիշեցնենք, որ 2012-ի մարտի 22-ին Մալիում զինված հեղաշրջում տեղի ունեցավ: Ռազմական խունտայի առաջնորդ Ամադու Սանոգոն հայտարարեց, որ իրենց նպատակը երկրի տարածքային ամբողջականության պահպանումն է: Այժմ իսլամիստների և անջատողականների իշխանության տակ են գտնվում երկրի հյուսիսի երեք առանցքային քաղաքները՝ Տիմբուկտուն, Գաոն և Կիդալը:
