Այսօր հայտնի դարձավ, որ ԱԺ պետաիրավական հանձնաժողովի նիստում որոշվել է մինչև 1 տարի ժամկետով հետաձգել Մարտի 1-ի գործով հանձնաժողով ստեղծելու ՀԱԿ-ի նախաձեռնությունը: Իր հերթին ԱԺ նախագահ Հովիկ Աբրահամյանը վստահեցրել է, որ նախագահական ընտրություններից հետո հանձնաժողովի ստեղծման հարցը դրական լուծում կստանա, և որ Մարտի 1-ի բացահայտմամբ ամենից շատ շահագրգռված է ու ամենից շատ գործ կատարում է խորհրդարանական մեծամասնությունը:
«Առաջին լրատվական»-ի հետ զրույցում 2008թ. «Մարտի 1»-ի զոհ Տիգրան Խաչատրյանի մայրը՝ Ալլա Հովհաննիսյանը, իր զարմանքը հայտնեց այս առումով` ասելով, որ դեմ է հանձնաժողով ստեղծելու նախաձեռնությունը հետաձգելուն: Նա հիշեցրեց Հանրապետական կուսակցության պատգամավոր Հովհաննես Սահակյանի խոսքերը, թե «Մարտի 1»-ից 5 տարի է անցել, էլ ի՞նչ բացահայտում: Ուստի, Ալլա Հովհաննիսյանի համոզմամբ, այս անգամ էլ հետաձգելով` կասեն, թե վեց տարի է անցել, էլ ի՞նչ բացահայտում: Նրա կարծիքով՝ Հանրապետական խմբակցությունը ժամանակ է շահում և ապագայում էլի դեմ է քվեարկելու հանձնաժողովի ստեղծմանը:
«Ես չեմ հավատում Հանրապետականի ոչ մի խոսքին: Անգամ Նաիրա Զոհրաբյանն ասել էր, որ կողմ են քվեարկելու, միայն Հանրապետականն է դեմ սպանությունների բացահայտմանը: Իսկ ՀԱԿ-ի համաձայնությունն այս մասով զարմանալի էր, ես գիտեի, որ դեմ կքվեարկեն հանրապետականները: Ես զարմանում եմ` ո՞նց է Կոնգրեսը հավատացել ՀՀԿ-ի հավաստիացումներին: Չգիտեմ, թող դրա պատասխանն իրենք տան: Բնականաբար, այսօր` չէ, բայց մենք ծնողներով պատրաստվում ենք հանդիպել, այս հարցը ևս կքննարկենք, և հնարավոր է՝ ՀԱԿ էլ գնանք, իրենց հանդիպենք, փորձենք հասկանալ, թե ինչն էր պատճառը»,- ասաց Ալլա Հովհաննիսյանը:
