Այսօր Երևանի Կապույտ մզկիթում կայացավ «Պաղեստինի հարցը ողջ մարդկության հարցն է» խորագրով համաժողով՝ ՀՀ-ում Իրանի դեսպանատան նախաձեռնությամբ: Միջոցառման ընթացքում ՀՀ-ում Իրանի արտակարգ և լիազոր դեսպան Մուհամմադ Ռեիսին ասաց, որ այս միջոցառումը հնարավորություն է ընձեռում պաշտպանելու Պաղեստինի նպատակները և արտահայտելու ատելություն սիոնիստական վարչակարգի օկուպացիայի և համաշխարհային կեղեքիչների այդ անմարդկային քայլերի նկատմամբ: Ըստ նրա՝ այս օրերին Պաղեստինի անմեղ կանանց ու երեխաների դաժան սպանությունը հաստատում է այն վարչակարգի դաժան բնույթը, որը ոչ մի ջանք չի խնայում իր նպատակներին հասնելու համար, և նրանց նպատակն է տարանջատել իսլամական երկրներն ու հարվածել դիմադրությանը:
«Իսրայելի հանցագործությունները Գազայում և պաղեստինցի անմեղ կանանց, տղամարդկանց ու երեխաների դաժան սպանությունները և ՄԱԿ ԱԽ-ի լուռ և անպատասխանատու պահվածքը սիոնիստական վարչակարգի հանցագործությունների հանդեպ ցավալի է: Ավելի քան երկու շաբաթ է, ինչ Իսրայելը, ոտնահարելով մարդկայնության սկզբունքները և խախտելով միջազգային ու մարդու իրավունքները, օգտագործելով ամենաժամանակակից սպառազինություններ, Գազայի հատվածի անմեղ բնակիչներին իր հարձակումների թիրախն է դարձրել։ Սա 600 քաղաքացիների սպանության և ավելի քան 4 հազար պաղեստինցիների վիրավորվելու պատճառ է դարձել:
Այս հումանիտար աղետը տեղի է ունենում ՄԱԿ-ի Անվտանգության խորհրդի՝ բավարարվածությամբ համակցված լուռ և անպատասխանատու պահվածքի և մարդու իրավունքների պաշտպանների կողմից Գազայի քաղաքացիների սպանությունները բացահայտ հովանավորելու ներքո: Գազայի բնակչությունն այսօր կանգնած է անբավարար բուժօգնության ու դեղամիջոցների մեծածավալ ճգնաժամի առջև, և խոչընդոտներ են հարուցվում այդ ուղղությամբ օգնություն ուղարկելուն։ Այս իրավիճակի շարունակվելը հումանիտար դաժան աղետի պատճառ է դարձել:
Ցավոք, այն քայլերը, որոնք ձեռնարկվել են հօգուտ Գազայի, այդ տարածաշրջանում աղետի մակարդակին չեն համապատասխանում, և անհրաժեշտ է, որ դադարեցվեն հարձակումները, վերացվի Գազայի շրջափակումն ու սնունդ և դեղամիջոցներ ուղարկվեն»,- ասաց դեսպանը՝ հավելելով, որ Իսրայելը, օգտվելով Մերձավոր Արևելքում զարգացումներից, փորձում է արաբական ու իսլամական երկրների ուշադրությունը կենտրոնացնել իր վրա և հետին պլան մղելով Պաղեստինի խնդիրները, շիաների ու սունների միջև առաջացնել խնդիրներ, որպեսզի այս ճանապարհով իրագործի իր խարդախ նպատակները:
Իսրայելի գործողությունները Պաղեստինի խաղաղ բնակչության դեմ դատապարտեց նաև Մեծի Տանն Կիլիկիո Կաթողիկոսության Թեհրանի հայոց թեմի առաջնորդ, Բարձրաշնորհ տեր Սեպուհ արքեպիսկոպոս Սարգիսյանը, որը Պաղեստինում տեղի ունեցող ոճրագործությունները նմանեցրեց Հայոց ցեղասպանությանը և մեկուկես միլիոն հայերի տեղահանությանն ու կոտորածին: Ըստ նրա՝ հայերն ու պաղեստինցիները պատմականորեն նույն ճակատագիրն են ունեցել: Եզրափակելով՝ սրբազանը խաղաղություն մաղթեց: Միջոցառումն ուղեկցվեց Պաղեստինից ու մասնավորապես Գազայից դաժանագույն տեսանյութերով:
Առաջարկում ենք մանրամասներին ծանոթանալ տեսանյութի միջոցով:
