Շուրջ երկու տարվա նախաքննությունից և երկու տարի տևած դատաքննությունից հետո մեղադրող դատախազ Բագրատ Պետրոսյանն այսօր վերաքննիչ դատարանում հրաժարվել է Վարշամ և Մանվել Ղարիբյանններին առնչվող հայտնի գործով մի քանի դրվագներով առաջադրված մեղադրանքից: Ըստ մեղադրանքի՝ գործով մնացել են մի քանի փոքր դրվագներ, որոնք ապաքրեականացնելը դժվար չէ:
Հիշեցնենք, որ եղբայրների միջև վեճը ծագել էր գույքի առուվաճառքի պատճառով, որը Վարշամ Ղարիբյանը, օգտագործելով նախկին գլխավոր դատախազ Աղվան Հովսեփյանի հովանավորությունը, ավելի էր խորացրել և հասցրել դատարան: Նա գործի դատաքննության ընթացքում բազմիցս է կրկնել, որ գործը հոգուտ իրեն է լինելու՝ ակնարկելով իր հովանավորին, սակայն, փաստորեն, բոլորովին այլ բան ստացվեց:
Գործով փաստաբան Սեդա Սաֆարյանի խոսքերով՝ իրենց համար ևս շատ անակնկալ է եղել այս ելքը: «Մեզ համար էլ էր անակնկալ այս ելքը, թեև որոշակի ակնկալիքներ դատարանից ունեցել ենք, քանի որ դատաքննության ընթացքում հարցադրումներից կարելի էր հասկանալ, թե շեշտադրումն ինչի վրա էր կատարվում: Սա կանխատեսելի էր նաև մեղադրանքի կողմի համար: Չեմ թերագնահատում այս գործի վերաբերյալ ներկա դատախազի դիքորոշումը: Տարիներ շարունակ քննված գործի արդյունքում հավաքված ապացույցները պետք է որ ըստ պատշաճի գնահատման ենթարկվեին»,- «Առաջին լրատվական»-ի հետ զրույցում ասաց տիկին Սաֆարյանը՝ հավելելով, որ ամեն դեպքում կարելի էր մինչև վերջ նայել արդարության աչքերին և հրաժարվել բոլոր դրվագներից էլ: «Մնացել են փոքր դրվագներ, որոնք ևս ըստ պատշաճի պետք է գնահատվեին: Ցավոք, մինչև վերջ չկարողացան օբյեկտիվության աչքերին նայել: Իրականում այս գործը հարուցման պահից ապօրինի էր և չպետք է հարուցվեր: Գիտենք նաև, թե ինչով էր պայմանավորված, և ում ազդեցությունն էր, որ այս գործը դարձավ գործ, և բազմաթիվ անձինք կալանավորվեցին: Բայց, ամեն դեպքում, այսքանն էլ ողջունելի է»:
Փաստաբանը ցավում է, որ այսօր իր պաշտպանյալը, որն այս գործի հետևանքով ապրումներից գործի քննության ընթացքում մահացավ, չի տեսնում այս հաջողությունը:
Տիկին Սաֆարյանից հետաքրքրվեցինք, թե ինչով է պայմանավորում մեղադրող դատախազի այս դիրքորոշումը՝ հաշվի առնելով, որ ի սկզբանե էլ պարզ էր, որ դրա հետևում կանգնած է նախկին գլխավոր դատախազ , ներկայիս քննչական կոմիտեի նախագահ Աղվան Հովսեփյանը: «Անգամ Աղվան Հովսեփյանի ներգրավվածության պայմաններում ես վստահ էի, որ բոլոր մեղադրանքները չէ, որ կարող էին դատավճիռ դառնալ: Պարզապես նոր դատախազի մոտեցումը իրավունքի դաշտում նոր մոտեցում էր: Չեմ կարծում, որ մեղադրող դատախազն առանց գործը քննարկելու եկավ ու մեղադրանքից հրաժարվեց, բայց գնահատում եմ դատախազի այս մոտեցումը»,- ասաց մեր զրուցակիցը: Վերջինիս դուր է եկել նաև այն, որ մեղադրող դատախազը մանրակրկիտ հիմնավորել է, թե ինչու է հրաժարվում մեղադրանքից, կողմերի փաստարկներն առանձին-առանձին վերլուծել է և գնահատականի արժանացրել:
«Գուցե սրանից հետո Վարշամ Ղարիբյանը հասկանա, որ մարդկանց հետ չի կարելի այսպես վարվել, որ անգամ եթե իր թիկունքում շատ մեծ մարդ է կանգնած, պետք չէ հատել մարդկայինի բոլոր սահմանները և անցնել առաջ: Թող չմտածի, թե իր խոսքի արժեքն այնքան մեծ է եղել, որպեսզի 17 հատոր քրեական գործը բացառապես կառուցվի իր տված փաստական տվյալների հիման վրա»,- եզրափակեց փաստաբանը:
Երեկ, երբ փորձեցինք Վարշամ Ղարիբյանից պարզել, թե ինչպես է գնահատում մեղադրող դատախազի՝ մեղադրանքից հրաժարվելու քայլը, պարոն Ղարիբյանն առանց հարցը լսելու հայտարարեց, որ ինքը հանգստանում է և անջատեց հեռախոսը:
