Գազայի հատվածի հյուսիսային Բեյթ-Հանուն քաղաքում պաղեստինցի փախստականների օգնության և աշխատանքների կազմակերպման ՄԱԿ-ի մերձավորարևելյան գործակալության դպրոցի վրա կատարված հարձակման հետևանքով զոհվել են կանայք, երեխաներ և համաշխահային կազմակերպության աշխատակիցներ: Այս մասին ասվում է ՄԱԿ-ի գլխավոր քարտուղար Պան Գի Մունի հայտարարության մեջ:
Ավելի վաղ «Ալ-Մայադին» հեռուստաալիքը՝ հղում անելով պաղեստինցի բժիշկներին, հայտնել էր, որ դպրոցին իսրայելական օդուժի հասցրած հրթիռային հարվածի հետևանքով զոհվել է առնվազն 10 մարդ, 150-ը վիրավորվել են:
Նշվում է, որ այնտեղ հարյուրավոր մարդիկ են թաքնվել: «Հանգամանքները դեռևս պարզ չեն: Ես դատապարտում եմ այդ գործողությունները»,- ասվում է Պան Գի Մունի հայտարարության մեջ:
Ինչպես լրագրողներին հայտնել է գլխավոր քարտուղարի պաշտոնական ներկայացուցչի տեղակալ Ֆարհան Հակը, այժմ զոհերի հաշվարկը շարունակվում է: «Մենք դեռևս չգիտենք, թե ով է կանգնած այդ հարձակման հետևում»,- ընդգծել է նա: Հակի խոսքով՝ Գազայում դիմակայության մեկնարկից ի վեր ՄԱԿ-ի մերձավորարևելյան գործակալության 3 աշխատակից է զոհվել:
