Ամերիկյան TIME պարբերականը Բիլ և Հիլարի Քլինթոններին անվանել է «եկամտի ամենատպավորիչ հավաքողները ԱՄՆ ամբողջ պատմության ընթացքում»։ Քաղաքական ասպարեզում ներկայության 32 տարիների ընթացքում ամերիկյան այդ զույգին հաջողվել է վաստակել գրեթե 1.5 մլրդ դոլար՝ բարեգործության, քաղաքական արշավների ու «դոնորների» օգնության հաշվին։
Պարբերականի տվյալներով, ամուսնական զույգը կես միլիոն դոլար է ստացել միայն իր բարեգործական հիմնադրամից, որը պայքարում է կլիմայի գլոբալ փոփոխությունների դեմ և մասնակցում տարերային աղետների վերացմանը։
Ժամանակին ընտանեկան հիմնադրամին մուծումներ են կատարել այնպիսի հայտնի դեմքեր, ինչպիսիք են ռեժիսոր Սթիվեն Սփիլբերգը և Espirit հագուստի գծի համահիմնադիր Սյուզի Թոմփքինսը։
Պարբերականը նշում է, որ Քլինթոնները քիչ եկամուտ չեն ստացել նաև այն արշավներից, որոնք ժամանակին առատաձեռնորեն վարձատրում էին Բիլ Քլինթոնի հրապարակային ելույթները։
Սակայն քաղաքական գործիչներին հաջովել է վաստակել ոչ միայն բարեգործությամբ և քաղաքական խաղերում։
Ընտանիքին քիչ եկամուտ չի բերել նաև ԱՄՆ նախկին պետքարտուղարի գրողական գործը։ Ինչպես գրում է Daily Mail պարբերականը, վերջին տարում Հիլարի Քլինթոնին հաջողվել է վաստակել մոտավորապես 12 մլն դոլար։
Ամռան սկզբին Հիլարի Քլինթոնը ներկայացրեց իր նոր՝ «Դժվար ընտրություն» գիրքը, որտեղ պատմում է ԱՄՆ արտաքին քաղաքական գերատեսչության ղեկավարի պաշտոնում իր չորս տարվա աշխատանքի մասին։ Փորձագետներն արդեն ԱՄՆ նախկին պետքարտուղարի գեղարվեստական աշխատանքն անվանել են 2016 թ. երկրի նախագահի թեկնածուի նախընտրական մանիֆեստ։
Թեև 66-ամյա Քլինթոնը դեռ չի հաստատել, որ պայքարելու է երկրի բարձրագույն պաշտոնի համար, նրա խորհրդականը ենթադրում է, որ նախագահական արշավը նախկին պետքարտուղարին կարժենա «աստղաբաշխական գումար», և կպահանջի շատ ավելի ծախսեր, քան ԱՄՆ ներկայիս նախագահ Բարաք Օբամայի քարոզարշավը։