Facebook սոցցանցից ամսական գոնե մեկ անգամ օգտվում է 1.32 մլրդ մարդ. վերջին 3 ամիսներին սոցցանցի լսարանը մեծացել է 40 միլիոն օգտատերերով: Այս մասին ասվում է Facebook-ի պաշտոնական հաղորդագրությունում՝ փոխանցում է Lenta.ru-ն:
Նշվում է, որ սոցցանցի լսարանի աճի տեմպերը նույն մակարդակի վրա են մնում վերջին մի քանի եռամսյակներին:
Սոցցանցի բջջային ծառայություններից ամսական օգտվում է 1.07 մլրդ մարդ՝ 1/3-ով ավելի, քան մեկ տարի առաջ: Facebook-ի ամսական ակտիվ բջջային լսարանն աստիճանաբար մոտենում է ծառայությունից օգտվողների ընդհանուր թվին:
Facebook-ի բջջային հավելվածներից օրական օգտվողների թիվը 2014-ի հունիսին կազմել է 654 միլիոն, այսպիսով՝ ակտիվ բջջային լսարանը մեկ տարում մեծացել է 41 տոկոսով: Ընդհանուր առմամբ սոցցանցի օրական ակտիվ լսարանն ընդլայնվել է 19 տոկոսով՝ հասնելով 829 մլն օգտատիրոջ:
Բջջային ուղղությունն առանցքային է Facebook-ի բիզնես ցուցանիշների համար: 2014-ի երկրորդ եռամսյակում բջջային գովազդին է բաժին ընկել ողջ բջջային եկամտի 62 տոկոսը կամ 1.66 մլրդ դոլարը:
