Ալիև-Սարգսյան հանդիպումը կկայանա ոչ թե Փարիզում, այլ, ամենայն հավանականությամբ, Նյու Յորքում՝ սեպտեմբերին: «Առաջին լրատվական»-ի հետ զրույցում այս մասին տեղեկացրեց Տարածաշրջանային հետազոտությունների կենտրոնի տնօրեն, քաղաքագետ Ռիչարդ Կիրակոսյանը՝ անդրադառնալով Սարգսյան-Ալիև հնարավոր փարիզյան հանդիպմանն ու խոսակցություններին, թե ինչու չի կայանում այդ հանդիպումը:
Նա հիշեցրեց, որ ՀՀ ԱԳ նախարար Էդուարդ Նալբանդյանն արդեն իսկ Բրյուսելում հանդիպում է ունեցել ԵԱՀԿ Մինսկի խմբի համանախագահների հետ՝ նախապատրաստելով նախագահների հանդիպում: Սա, նրա համոզմամբ, ցույց տվեց, որ Հայաստանի կողմից կա պատրաստակամություն՝ իրականացնելու նախագահական այս հանդիպումը:
«Մարտահրավերը հիմնականում գալիս է Ադրբեջանից, որը նաև նշանավորվում է Ադրբեջանի կողմից շփման գծում լարվածության, ինչպես նաև ներխուժումների միջոցով: Ես կարծում եմ, որ Հայաստանի ու Ադրբեջանի նախագահներն, այնուամենայնիվ, կհանդիպեն, սակայն դա չի լինի Փարիզում և չի լինի շուտ: Ամենայն հավանականությամբ, նրանք կհանդիպեն սեպտեմբերին՝ Նյու Յորքում, ՄԱԿ-ի ԳԱ-ի հանդիպումների ընթացքում»,- տեղեկացրեց Ռիչարդ Կիրակոսյանը՝ հավելելով, որ կա ևս մեկ մարտահրավեր, որը կարող է գալ Ռուսաստանի կողմից՝ պայմանավորված ԵԱՀԿ Մինսկի խմբի ամերիկացի համանախագահ Ջեյմս Ուորլիքի վերջին հայտարարություններով:
Ռիչարդ Կիրակոսյանի հետ զրույցն ամբողջությամբ՝ ավելի ուշ:
