Ռուսաստանն ու Քաթարը, որոնք ընդունելու են ֆուտբոլի աշխարհի 2018թ. և 2022թ. առաջնությունները, կոռուպցիոն խոշոր սկանդալի կենտրոնում են:
Վերոգրյալ երկրներն աշխարհի առաջնության անցկացման իրավունք են ստացել դեռ 2010թ.՝ ՖԻՖԱ-ի գործկոմի շրջանում կազմակերպված քվեարկության արդյունքում:
Մարտի սկզբին բրիտանական ԶԼՄ-ներում տեղեկություններ էին շրջանառվում, որ կազմակերպությունը, որը պատկանում է Ասիայի ֆուտբոլի կոնֆեդերացիայի նախագահ Մոհամեդ բին Համամին, Կենտրոնական ու Հյուսիսային Ամերիկայի ֆուտբոլի կոնֆեդերացիայի (ԿՈՆԿԱԿԱՖ) նախագահ Ջեք Ուորներին վճարել է 2 մլն դոլար, որպեսզի գնի վերջինիս ձայնը: Այս գործը քննում է Հատուկ ծառայությունը:
Ավելի ուշ նոր տեղեկություններ շրջանառվեցին, որ Բին Համամը վճարել է ևս 5 մլն դոլար կաշառք:
Ավելի վաղ լայնածավալ հոդված էր հրապարակել France Football պարբերականը, որտեղ մոտ 80 էջից կազմված զեկույցում ներկայացվում էր պարբերականի երկարաժամկետ հետաքննության արդյունքը: Նշվում էր Ռուսաստանն ու Քաթարը քվեարկությանը մասնակցած անձանց, սպորտային արբիտրաժային դատարանի ներկայացուցիչներին ընդհանուր առմամբ վճարել են մոտ 8-ական մլրդ դոլար՝ Մունդիալի անցկացման իրավունքի գնման համար:
Նշվում էր նաև, որ Փարիզում հանդիպել էին Նիկոլյա Սարկոզին, ով այն ժամանակ դեռ Ֆրանսիայի նախագահն էր, ՈւԵՖԱ-ի նախագահ Միշել Պլատինին ու Քաթարի շեյխերից Նասեր Ալ-Հելաիֆին: Սարկոզին ու Պլատինին իրենց աջակցությունն էին առաջարկել, փոխարենը շեյխը պետք է ձեռք բերեր ֆրանսիական ակումբ ու այն դարձներ գրանդ՝ ձեռք բերելով ֆուտբոլային մի շարք աստղերի տրանսֆերներ:
Զեկույցում հստակ նշվում էր հանդիպման օրը, տեղը, ժամը, բազմաթիվ մանրամասներ՝ նրանց խոսակցությունից: Հիշեցնենք, որ Ալ-Հելաիֆին գնել է ֆրանսիական ՊՍԺ-ն: ՖԻՖԱ-ն շարունակում է հետաքննությունը:
