Ժամեր անց Նիդերլանդների մայրաքաղաք Ամստերդամում կմեկնարկի տարվա խոշորագույն մանկական տոնը՝ «Մանկական Եվրատեսիլ» երգի միջազգային փառատոնը: Նախորդ տարիներին Հայաստանն այս մրցույթում ներկայացել է լավագույնս: Այս տարի Ամստերդամի բեմում իրենց երգն են հնչեցնելու հայ փոքրիկ «բիթլսիկները»՝ Compass Band-ը: Նրանք հանդես են գալու Sweety Baby երգով: Հայ հեռուստադիտողները կարող են մրցույթին հետևել Հանրային հեռուստաընկերության եթերում կամ առցանց «Մանկական Եվրատեսիլի» պաշտոնական կայքէջում ժամը 23:15-ին: Հայ փոքրիկ երգիչները հանդես են գալու 8-րդ համարի ներքո: «Մանկական Եվրատեսիլ» մրցույթում հաղթողը որոշվում է ժյուրիի և հանդիսատեսի քվեարկության արդյունքում` 50/50 հարաբերակցությամբ:
Նշենք, որ Compass Band-ը ձևավորվել է 2011թ.` Սուրբծննդյան միջոցառման ժամանակ, Չեխովի անվան դպրոցում, որտեղ սովորում են տղաները: Դավիթը, Աբրահամը, Արշավիրն ու Արամը մոտ ընկերներ են, որոնցից յուրաքանչյուրը երաժշտության մեջ ունի իր կուռքը: Տղաները հանդես են գալիս հանրահայտ «Բիթլս» ռոք խմբի ոճով:
Հիշեցնենք, որ «Մանկական Եվրատեսիլ» երգի միջազգային մրցույթին Հայաստանը մասնակցում է 2007 թվականից: Իսկ 2010 թվականին մրցույթը հաղթեց հայ փոքրիկ երգիչ Վլադիմիր Արզումանյանն իր «Մամա» երգով: Անցյալ տարի Հայաստանը հյուրընկալեց մրցույթը, իսկ երգչուհի Դալիթան բոլորին հրավիրեց Հայաստան իր Welcome to Armeni երգով:
