ՀԱԿ-ը, հիմա արդեն ՀԱԿ-ի ժառանգորդը՝ ԲՀԿ-ն, կարծես թե, խոսում են նույն բանի՝ բուրժուադեմոկրատական հեղափոխության մասին: Այսօր «Առաջին լրատվական»-ի հետ զրույցում նման տեսակետ հայտնեց քաղաքագետ, քաղաքացիական ակտիվիստ Անդրիաս Ղուկասյանը՝ խոսելով Հայաստանում հեղափոխության և բուժուադեմոկրատական հեղափոխության հնարավորության շուրջ:
Նա նշեց, որ հեղափոխության համար անհրաժեշտ են հեղափոխականներ, անհրաժեշտ է, որ երկրում համապատասխան պայմաններ ձևավորվեն, հասարակությունը հասկանա փոփոխությունների անհրաժեշտությունը և պատրաստ լինի մասնակցել այնպիսի քաղաքական գործընթացի, ինչպիսին է հեղափոխությունը: Ըստ Ա. Ղուկասյանի՝ ժամանակակից հեղափոխությունը քաղաքացիական անհնազանդությունն է, որը դրսևորվում է գոյություն ունեցող ռեժիմի դեմ, իսկ դասական հեղափոխությունը զինված ապստամբությունն է:
«Հաշվի առնելով երկրի ունիկալ պայմանները՝ ՀՀ-ում զինված ապստամբություն հնարավոր է միայն այն դեպքում, եթե նման գործընթացի հեղինակը հենց բանակը լինի՝ որպես քաղաքական սուբյեկտ, հակառակ դեպքում այն պարզապես անհնարին է, որպես սցենար: Այսօր քաղաքացիական անհնազանդությունն է հասանելի՝ որպես գործիք, որպես հեղափոխական միջոց իշխանափոխության համար»,- նկատեց նա՝ հավելելով, որ Հայաստանում ձևավորվում են հեղափոխական ուժեր՝ հաշվի առնելով Հայաստանի կուսակցական համակարգում տիրող ճգնաժամը: Անդրիաս Ղուկասյանի համոզմամբ՝ չկան հասարակության վստահությունը վայելող գործիչներ, չկան ծրագրեր, չկան քաղաքական ուժեր, որոնք կարող են հասարակության շրջանում ապագայի նկատմամբ հույս ձևավորել:
Անդրադառնալով ժամանակ առ ժամանակ շրջանառվող բուրժուադեմոկրատական հեղափոխություն իրականացնելու վերաբերյալ խոսակցություններին՝ մեր զրուցակիցն ասաց, որ ոչ միայն ՀԱԿ-ը, այլև այսօր ցանկացած քաղաքական ուժ, որը փորձում է մրցակցել իշխանության հետ, առաջին հերթին փորձում է հենվել բուրժուազիայի վրա և առաջին հերթին փորձում է գրավել բուրժուազիային, միջին դասակարգը՝ այս շերտի շահերը պահպանող ուժի կեցվածք ընդունելով: Քաղաքագետի դիտարկմամբ՝ սա, ամենայն հավանականությամբ, պայմանավորված է այն հանգամանքով, որ բուրժուազիան ֆինանսապես կարող մի հատված է հասարակության համար:
«Հանդես գալով ի պաշտպանություն բուրժուազիայի շահերի՝ քաղաքական տեխնոլոգիայի առումով ուժը հնարավորություն է ստանում բուրժուազիայից ֆինանսական աջակցություն ակնկալել։ Դրա համար ՀԱԿ-ը, հիմա արդեն ՀԱԿ-ի ժառանգորդ ԲՀԿ-ն կարծես թե երկուսն էլ խոսում են նույն բանի մասին՝ բուրժուադեմոկրատական հեղափոխության, որովհետև «բուրժուա» մասը վերաբերում է մասնավոր սեփականատերերին, իսկ «դեմոկրատական» մասը՝ հասարակության այն մյուս զանգվածներին, որոնք չունեն մասնավոր սեփականություն և պարզապես ակնկալում են իրենց սոցիալական դրության փոփոխություն»,- ասաց Անդրիաս Ղուկասյանը:
