Այս օրերին շուկայում՝ սուպերմարկետներում, մեծ ու փոքր խանութներում, բավական դժվար է գտնել «Կիլիկիա» գարեջուր: Վաճառողների խոսքով՝ արդեն 1 շաբաթից ավելի է, ինչ «Կիլիկիա» գարեջրի առաքիչները գարեջուր չեն բաժանում խանութներում, քանի որ այն չի արտադրվում: Որոշ տեղեկություններով՝ գարեջրի գործարանում այս օրերին հարկային մարմինների կողմից ստուգումներ են իրականացվում, ինչի պատճառով էլ գարեջուր չի արտադրվում: Իսկ այդ ստուգումները իրականացվում են Հովիկ Աբրահամյանի՝ գործարարներին ստվերից հարկային դաշտ բերելու «օպերացիայի» շրջանակներում:
«Կիլիկիա» գարեջրի գործարանի սեփականատեր, ՀՀԿ-ական պատգամավոր, ՀՀ ԱԺ տնտեսական հարցերի մշտական հանձնաժողովի անդամ Հակոբ Հակոբյանը, սակայն, հերքեց, թե գարեջրի արտադրության հետ կապված խնդիրներ կան, և որ հարկայինը ստուգումներ է իրականացնում գործարանում:
Հակոբ Հակոբյանը օրերս «Առավոտ» օրաթերթի հետ զրույցում խոստովանել էր, որ 20-25 տոկոսով ստվերում է գործել, բայց արդեն կողմ է «սպիտակ դաշտում աշխատելուն»: «Եղել է 20-25 տոկոս ստվեր: Ես դա երբեք չեմ թաքցրել, ցանկացած շրջանակում էլ ասել եմ: 20-25 տոկոսը ես համարում եմ չափավոր ստվեր: Իսկ չափավոր ստվերը… ծախսեր կան, որոնք դու չես կարողանում անել, որը վնասում է քո տնտեսությանը: Այդ ստվերով կարողանում ես հոգալ: Իսկ հիմա դա չկա: Իհարկե, խնդիրներ ունենք, դժվարանում ենք: Նախկինում հեշտությամբ լուծել ենք որոշ հարցեր, հիմա չենք կարողանում»,- «Առավոտ»-ին ասել էր գործարար պատգամավորը:
Վերջինս, սակայն, այսօր «Առաջին լրատվական»-ի հետ զրույցում պնդեց, որ ինքը միշտ էլ ստվերից դուրս է աշխատել, և կառավարության բարեփոխումները, հուլիսի 1-ը իրեն չեն վերաբերում:
Այս և մի քանի այլ հարցերի շուրջ զրուցեցինք Հակոբ Հակոբյանի հետ:
– Պարոն Հակոբյան, ինչո՞ւ «Կիլիկիա» չի արտադրվում:
– Նման բան չկա, դրանք ուղղակի ստից բաներ են, որով փորձ է արվում ինձ խառնել չգիտեմ ում հետ: «Կիլիկիա» գարեջուրը, որը սկսել ա արտադրվել 97 թվականից, միշտ աշխատել ա ու հիմա էլ աշխատում ա: Անցած տարի միայն 3 օր չի աշխատել՝ սարքավորման փչանալու պատճառով, բայց հիմա խնդիր չկա:
– Բայց սպառողները խանութներում չեն գտնում ձեր գարեջուրը:
– Չկա նման բան: Ես հասկանում եմ՝ դուք ինչ եք ուզում ասել, բայց նման բան չկա: Մենք վաճառում ենք էնքան, ինչքան միշտ վաճառել ենք:
– Տեղեկություններ կան, որ այս օրերին Ձեր գործարանում հարկային ստուգումներ են իրականացվում, այդ պատճառով էլ դադարեցվել է գարեջրի արտադրությունը:
– Կառավարության սկսած քայլերը միայն «Կիլիկիա»-ին չեն վերաբերում, այլ նաև ՀՀ-ում բոլոր արտադրատեսակներին, անկախ նրանից՝ ներկրվո՞ւմ են, թե՞ արտադրվում: Կառավարության այդ գործողությունները մեր աշխատանքին չեն խոչընդոտում:
– Ձեր գործարանում ստուգումներ եղե՞լ են:
– «Կիլիկիա»-ում՝ ոչ, բայց խանութներում լինում են: Մտնում են խանութներ և հարցնում «Կիլիկիա»-ի և մյուս ապրանքների փաստաթղթերը, ճշգրտում են: Եվ ճիշտ են անում:
– Իսկ Դուք հավատո՞ւմ եք նոր կառավարության սկսած բարեփոխումներին: Հնարավո՞ր է, որ Հայաստանում բոլորը ստվերից դուրս նույն՝ հավասար հարկային դաշտում աշխատեն:
– Ես այսօրվա վարչապետից մեծ սպասելիքներ ունեմ: Եվ մենք էլ՝ ինձանից սկսած, ձեզանից վերջացրած, մեր տեղում պետք ա մեր աշխատանքով նպաստենք, որպեսզի վարչապետի ասածները իրականություն դառնան: Ես նախկինում խոսել եմ ստվերի մասին, չեմ ուզում կրկնել, բայց հնարավոր է՝ գա այդ ժամանակը, երբ էլ ստվեր չի լինի: Հիմա մոտենում ենք վարչապետի ասածին: Էն, ինչ եղել ա նախկինում, հիմա էլ չկա: Վարչապետը ֆինանսների նախարարության հետ համատեղ ակտիվ հետևում ա:
– Ինչի՞ց եք հասկացել, որ ամեն ինչ այլևս նախկինի նման չէ: Հուլիսի 1-ից հետո խոստացված փոփոխությունները, խաղի նոր կանոնները Ձեզ համար տեսանելի՞ են:
– Ճիշտն ասած՝ ես նոր եմ վերադարձել քաղաք, հանգստանում էի, դեռ «Կիլիկիա» չեմ գնացել, բայց իմ կարծիքով՝ երևում են փոփոխությունները:
– Պարոն Հակոբյան, իսկ Ձեր կարծիքով՝ ինչո՞ւ է հիմա բարձրաձայնվում ստվերի մասին, երբ այդ վիճակը միշտ եղել է:
– Երբ որ ուսումնասիրում ենք զարգացած երկրների անցած ճանապարհը, հավատացնում եմ ձեզ՝ բոլորն այդ ճանապարհով անցել են: Դա նորմալ երևույթ է, որովհետև եթե զարգացած երկրներն այդ ճանապարհով են անցել, ապա օրերից մի օր էլ մեզ մոտ պետք է ամեն ինչ ճիշտ ձևով աշխատի:
– Օրերս ՊԵԿ-ը հրապարակեց 15 տնտեսվարողների անուններ, որոնք վերջին շրջանում ավելացրել էին իրենց հարկերը կամ, այլ կերպ ասած, դուրս էին եկել ստվերից: Բայց այդ ընկերությունների մեծ մասը հանրությանն անհայտ ընկերություններ էին: Ձեր կարծիքով՝ այսօր Հայաստանում ավելի շատ այդ փոքր ու միջին բիզնե՞սն է ստվերում, թե՞ խոշորները:
– Ճիշտն ասած՝ ես չեմ կարող այդ հարցին պատասխանել: Ես կարող եմ միայն «Կիլիկիա»-ի փոխարեն պատասխանել, որը որ 100 տոկոսով աշխատում է օրինական դաշտում:
– Բայց Դուք ասել էիք, որ նախկինում 20-25 տոկոս ստվեր եք ունեցել:
– Ես միշտ ստվերից դուրս եմ եղել և միշտ էլ օրինական հարկային դաշտում եմ եղել: Իսկ հուլիսի 1-ը ու մնացած օրերը ինձ չեն վերաբերում: Ես 100 տոկոսով ստվերից դուրս եմ եղել միշտ:
