ՄԱԿ-ում Պաղեստինին դիտորդ պետության կարգավիճակի շնորհումը չի անդրադառնա ԼՂ հարցի վրա: «Առաջին լրատվական»-ի հետ զրույցում այս մասին ասաց «Մոդուս Վիվենդի» կենտրոնի ղեկավար, Կանադայում ՀՀ նախկին դեսպան Արա Պապյանը՝ անդրադառնալով ՄԱԿ-ում Պաղեստինին դիտորդ պետության կարգավիճակ շնորհելուն: Արա Պապյանը, համեմատելով Պաղեստինի և Արցախի խնդիրները, ասաց, որ հարցերը բավականին մոտ են` երկուսն էլ ժողովուրդների ինքնորոշման հիման վրա ընթացող գործընթացներ են, բայց նաև` էապես տարբեր:
«Պաղեստինը բազմաթիվ երկրների կողմից արդեն ճանաչվել է, սա չի դիտվում որպես նրա պետականության ճանաչում: Պաղեստինի ազատագրական շարժումը ուներ կարգավիճակ ՄԱԿ-ում, որպես շարժում ներկայացված էր: Հետևաբար ՄԱԿ-ում Պաղեստինին դիտորդ երկրի կարգավիճակ շնորհելը միգուցե լավ է, բայց էական ազդեցություն չի ունենա ԼՂ հարցի վրա, Ադրբեջանն ինքը քվեարկել է սրա օգտին: Սա թույլ է տալիս ենթադրելու` Ադրբեջանը լավ է հասկանում, որ կարող է շրջանցել ԼՂ հարցը»,- մեկնաբանեց Արա Պապյանը:
Հիշեցնենք, որ հինգշաբթի օրը ՄԱԿ-ի Գլխավոր ասամբլեան ճանաչել է Պաղեստինի` համաշխարհային կազմակերպությունում դիտորդ պետության կարգավիճակը: Համապատասխան բանաձևը հավանության է արժանացրել ՄԱԿ-ի 193 անդամ երկրներից 138-ը, դեմ է հանդես եկել 9-ը, ձեռնպահ` 41-ը, մնացածներն ընդհանրապես չեն քվեարկել: