Արարատի և Վայոց ձորի մարզերի ընդհանուր իրավասության դատարանում այսօր ավարտվեցին դաժան սկեսրոջ կողմից տանջանքների և կտտանքների ենթարկված հարսի՝ Մարիամ Գևորգյանի գործով դատական նիստերը: Այս մասին «Առաջին լրատվական»-ի հետ զրույցում տեղեկացրեց ինքը` Մարիամ Գևորգյանը:Նա նշեց, որ նախկին սկեսուրը՝ Հայկանուշ Միքայելյանը, 4 տարվա ազատազրկման մեկ երրորդի մասով ներումէ ստացել, ուստի ազատազրկվել է 1 տարի երկու ամիս ժամկետով: Մ. Գևորգյանի խոսքով`սա շատ քիչ էնրա նման հանցագործների համար, որի պատճառով էլ պատրաստվում ենդատավճիռը բողոքարկել դատական ատյաններում: Ըստ Մ. Գևորգյանի՝ թեև սպասելի էր նման ելքը, բայց բավարարված չեն:
«Գիտեի, որ Հայաստանում օրենք գոյություն չունի, ուստի երբեք չեմ հավատացել, որ արդարացի դատավճիռ կկայացվի: Իմ կարծիքով՝ նման հանցագործներին պետք է ցմահ ազատազրկեն, որպեսզի հետագայում նրանք չարիք չգործեն: Դա իմ անձնական կարծիքն է, սակայն թող օրենքով ինչքան նախատեսվում էր, այնքան էլ ազատազրկեին, բայց ոչ մեկ երրորդով: Նույն կերպ էլ նախկին ամուսինս ներում ստացավ իմ նկատմամբ նման սադիստական վերաբերմունքից հետո»,- նշեց Մարիամ Գևորգյանը՝ շարունակելով, որ ամբողջ դատաքննության ընթացքում սպառնալիքներ է ստացել նախկին ամուսնուց և նրա հարազատներից:
Նշենք, որ ինչպես ինքը` տուժած հարսն էր ավելի վաղ պատմել, սկեսուրը՝ Հայկանուշ Միքայելյանը, իրեն խոշտանգումների է ենթարկել որդու` Դավիթ Զիրոյանի հետ: Գևորգյանը Զիրոյանի հետ ամուսնացել էր 2009 թվականի նոյեմբերին, նույն տարվա դեկտեմբերին տեղափոխվել էր Սանկտ Պետերբուրգ, որտեղ նրան 10 ամսվա ընթացքում պարբերաբար ծեծի և կտտանքների էին ենթարկել: Երևան վերադառնալուց հետո Գևորգյանը դիմել էրոստիկանություն:
Ամուսնուն մեղադրանք էր առաջադրվել «Դիտավորությամբ ուրիշի առողջությանը միջին ծանրության վնաս պատճառելու» և «Ծեծ» հոդվածներով, որի համաձայն՝ նրան կարող էին դատապարտել մինչև 3 տարվա ազատազրկման: Դատարանի որոշմամբ` Զիրոյանն ազատ է արձակվել Հայաստանի Հանրապետության 20-ամյակի կապակցությամբ ՀՀ նախագահի կողմից հայտարարված համաներմամբ:
Հայկանուշ Միքայելյանին մեղադրանք էր առաջադրվել Քրեական օրենսգրքի 113 («Միջին ծանրության վնասվածքներ հասցնել») և 119 («Խոշտանգում») հոդվածներով:
