Իտալիայում գործազրկությունը 2012 թվականի հոկտեմբերի տվյալներով հասել է 11.1 տոկոսի՝ 1999 թվականի առաջին եռամսյակից հետո առավելագույն ցուցանիշին: Այս մասին հայտնում է RBK-ն՝ հղում անելով իտալական ISTAT վիճակագրական ինստիտուտի այսօր հրապարակված զեկույցին:
Արդյունքը ավելի վատն է, քան վերլուծաբանների կանխատեսումները, որոնց համաձայն՝ հոկտեմբերին գործազրկության 10.9 տոկոսի մակարդակ էր նախատեսվում: Սեպտեմբերին գործազրկությունը կազմել է 10.8 տոկոս:
Այսօր եվրոպական վիճակագրական Eurostat գործակալությունը հաղորդել է, որ եվրոգոտում (17 երկիր) գործազրկության մակարդակը 2012-ի հոկտեմբերին բարձրացել է 0.1 տոկոսով` համեմատած սեպտեմբերի տվյալների հետ, և կազմել է 11.7 տոկոս՝ սեզոնայնության հաշվարկով:
Երեկ էլ հայտնի է դարձել, որ Ֆրանսիայում գործազուրկների թիվը հոկտեմբերին հասել է 14.5 տարվա մեջ առավելագույնի և կազմել 3 մլն 103 հազար մարդ՝ սեպտեմբերի համեմատ 45.4 հազարով ավելի: Ֆրանսիայի Աշխատանքի նախարարությունը զգուշացրել է, որ տնտեսության վատթարացող վիճակի պատճառով գործազուրկների թիվը կարող է աճել:
Իսպանիայում 2012-ի երրորդ եռամսյակում գործազրկությունը հասել է 25 տոկոսի: 1970-ականներից ի վեր երկրում նման մեծ թվով գործազուրկներ չէին եղել: Քանակական արտահայտմամբ Իսպանիայում գործազուրկ է 5.8 մլն մարդ:
Ծանր ֆինանսական ճգնաժամում գտնվող Հունաստանում գործազուրկ է գրեթե յուրաքանչյուր 4-րդը:
Եվրոգոտում գործազրկության ամենացածր մակարդակը սեպտեմբերի տվյալներով գրանցվել է Ավստրիայում (4,4%), Լյուքսեմբուրգում (5,2%), Գերմանիայում և Նիդեռլանդներում (5,4%):
