«Գաֆէսճեան» արվեստի կենտրոնը (ԳԱԿ) տեղեկացնում է, որ «Երևանյան կոլեկցիոներների ընտրությունը» ցուցահանդեսը կփակվի դեկտեմբերի 16-ին: Մինչ այդ, սակայն, արվեստի կենտրոնը հայտնում է, որ դեկտեմբերի 1-ից ցուցահանդեսի մուտքը «Արծիվ» սրահ անվճար է լինելու: Այս մասին «Առաջին լրատվական»-ին տեղեկացնում են «Գաֆէսճեան» արվեստի կենտրոնի մամլո ծառայությունից:
«Երևանյան կոլեկցիոներների ընտրությունը» ցուցահանդեսը ներկայացնում է երեք կոլեկցիոների՝ արվեստաբան Պողոս Հայթայանի, նկարիչ Ռոբերտ Էլիբեկյանի և ճարտարապետ Օշին Եղիազարյանցի արվեստի հավաքածուների ընտրանին: Առաջին անգամ հանրությանը ներկայացվող ստեղծագործությունների այս բացառիկ ընտրանին կրկին նշանավորում է ցուցադրված արվեստագետներին և կոլեկցիոներներին, որոնց բարի կամքի, սեփական հավաքածուն հանրությանը հասանելի դարձնելու պատրաստակամության շնորհիվ հնարավոր դարձավ սույն ցուցադրությունը:
«Գաֆէսճեան» արվեստի կենտրոնի նախաձեռնությունը հայաստանաբնակ մասնավոր կոլեկցիոներներին բացահայտելն է և նրանց արվեստի հավաքածուները ցուցադրելը: Այս բացառիկ նախագծով «Գաֆէսճեան» արվեստի կենտրոնը ստեղծում է եզակի մշակութային հարթակ այլ մասնավոր հավաքածուների՝ թանգարանային միջավայրում ցուցադրման համար՝ վերահաստատելով անհատ կոլեկցիոների հանրային դերն ու ներդրումը՝ որպես մշակութային ժառանգության պահպանման կրողի:
