«Հայաստանի էլեկտրական ցանցեր» ՓԲԸ-ն Հանրային ծառայությունները կարգավորող հանձնաժողովին է ներկայացրել 2013-2015 թթ. առաջարկված ներդրումային ծրագիրը: Ըստ այդմ՝ հաջորդ տարի ՀԷՑ-ը նախատեսում է ներդնել 9 մլրդ 669 մլն դրամ, 2014-ին՝ 8 մլրդ 441 մլն դրամ, 2015-ին՝ 8 մլրդ 291 մլն դրամ: Ընկերության ներդրումների ընդհանուր ծավալն այս տարի կկազմի 8.4 մլրդ դրամ:
Փաստաթղթում նշվում է, որ 2009-2012 թթ. ընթացքում ՀԷՑ-ը կատարել է խոշոր ներդրումներ՝ սպառողների հոսանքազրկման հաճախականության և տևողության կրճատման նպատակով: Ներկայացվող եռամյա ներդրումային ծրագրում նախատեսվում է կրճատել ներդրումներն այս ուղղությամբ:
Ծրագրի կարևորագույն խնդիրներից է բազմաբնակարանային շենքերի մուտքերում էլեկտրամատակարարման ցանցի բարելավման աշխատանքների իրականացումը, որի համար նախատեսվում է 300 մլն դրամ: 2012 թ. ընթացքում ընդհանուր հաշվով 150 շենքերում կկատարվի ներմուտքային ցանցի բարելավում: 2013 թ. նախատեսվում է վերակառուցել ներմուտքային ցանցը 230 շենքերում, իսկ 2014 թ. և 2015 թ.տարեկան 330 շենքերում կկատարվեն նմանատիպ աշխատանքներ:
Ընկերությունը նախատեսում է ամբողջությամբ վերակառուցել Աջափնյակ-1,2 և Մերգելյան-1,2 35 կՎ մալուխային գծերը: Նշված գծերը գտնվում են խիստ վթարային վիճակում: Վթարների վերացման համար տարեկան ծախսվում է 50-70 մլն. դրամ, ընդ որում՝ այդ ծախսերը տարեցտարի աճի միտում են ցուցաբերում: Այդ գծերի վերակառուցումը թույլ կտա 20-25 տարով զրոյացնել դրանց շահագործման և վթարների վերացմանն ուղղված ծախսերը:
«Այս գծերի վերակառուցումը զգալիորեն կբարձրացնի Երևան քաղաքի Աջափնյակ թաղամասի և Կոմիտասի պողոտայի շրջակայքի էլեկտրամատակարարման հուսալիությունը»,- հավաստիացնում են ՀԷՑ-ում:
