Ռուսական Regnum լրատվական գործակալությանփոխանցմամբ՝ադրբեջանական 1news.az և Gun.az իշխանամետ գործակալությունների կայքերում երեկ հայտնվել է «Քաղաքական կեղտոտ, պատվերով PR կամ կզրկվի՞ BP-ն Ադրբեջանում նավթային կոնսորցիումի օպերատորությունից» հնչեղ վերնագրով խմբագրական հոդված, որում British Petroleum ընկերությունն անուղղակիորեն մեղադրվում է Ադրբեջանում հեղաշրջում պատրաստելու մեջ:
Հոդվածում խոսքը Ադրբեջանին հասցեագրված բրիտանական մամուլի (Daily Mail և Independent) ոչ վաղ անցյալի քննադատական հրապարակումների մասին է: Որպես դրա պատճառ՝ հեղինակը մատնացույց է անում BP-ի շուրջ Ադրբեջանում ծավալված վերջին զարգացումները՝ կապված այդ կազմակերպության կողմից երկրում իր պարտականությունների «անփույթ կատարման հետ, ինչի հետևանքով» ընկել էր «Ազերի» և «Չըրաղ» նավթահանքերի արդյունաբերության ծավալը:
Հեղինակն ընդգծում է, որ BP-ն «մասնակից» է բրիտանական ԶԼՄ-ներում ծավալված հակաադրբեջանական կամպանիային և մասնավորապես բրիտանական վերոնշյալ թերթերի քննադատական հոդվածներին: Որպես դրա «ապացույց»՝ հեղինակը BP-ի շուրջ անցկացնում է պատմական էքսկուրս՝ հիշեցնելով Մերձավոր Արևելքում BP-ի գործունեությունը, երբ բրիտանական ընկերությունը քանիցս ճնշումներ է գործադրել այն երկրների իշխանությունների վրա, որոնցում նա գործունեություն է ծավալել.
«1950-ական թվականներին Իրանի կառավարության կողմից նավթային արդյունաբերության ազգայնացումը փաստացիորեն Մեծ Բրիտանիայի ու Իրանի միջև դիվանագիտական հարաբերությունների խզման պատճառ դարձավ: 1953 թվականի օգոստոսին ամերիկյան հատուկ ծառայությունները, ոչ առանց բրիտանական ընկերության օգնության, Իրանում կազմակերպեցին հեղաշրջում, ինչի հետևանքով գահընկեց արվեց Իրանի վարչապետ Մոսադեղը, և բրիտանացիները վերադարձրին Իրանի տնտեսության վրա ունեցած իրենց ազդեցությունը:
20-րդ դարի վերջին BP-ն բազմիցս հայտնվել է խոշոր սկանդալների կենտրոնում, ինչը հատկապես վերաբերում է ծովում թունավոր աղբը սուզելու անհաջող փորձերին: 1990-ական թվականներին BP-ն ակտիվորեն քննադատել է Լատինական Ամերիկայում մարդու իրավունքների վիճակը՝ աջակցելով իշխանությունների բռնությունների դեմ պայքարող ընդդիմությանը: Այժմ էլ այդ ընկերությունը հակաադրբեջանական կեղտոտ PR է ծավալել Ադրբեջանի իշխանությունների դեմ»:
