Грузия Online-ի փոխանցմամբ՝ Վրաստանի վարչապետ Բիձինա Իվանիշվիլին իր դժգոհությունն է հայտնել Վրաստանի ներքին զարգացումների վերաբերյալ արևմտյան մամուլի հրապարակումների կապակցությամբ: Իվանիշվիլին հայտարարել է, որ մտադիր է նրանցից մի քանիսից պատասխան պահանջել դրա համար:
Վրաստանի նոր իշխանությունները փորձում են երկրի բնակչությանը համոզել, թե առաջատար ԶԼՄ-ների տվյալ հոդվածները հանդիսանում են նախագահի ու նրա լոբբիստական կազմակերպությունների գործունեության արդյունք:
Սրանից առաջ էլ «Վրացական երազանք» դաշինքի ներկայացուցիչներն արդեն իսկ մեղադրել են «Միասնական ազգային շարժում» կուսակցությանը՝ Վրաստանում ընթացող գործընթացների վերաբերյալ ՆԱՏՕ-ին ու միջազգային հանրությանը սխալ տեղեկատվություն տրամադրելու մեջ, ինչն էլ, նրանց կարծիքով, պատճառ է հանդիսացել ՆԱՏՕ-ի գլխավոր քարտուղար Անդերս Ֆոգ Ռասմուսենի կոշտ հայտարարության համար:
Անդրադառնալով ամերիկյան The Washington Post թերթի «Վրաստանի կառավարությունը թեքվում է ոչ այն կողմ» հրապարակմանը՝ Բիձինա Իվանիշվիլին հայտարարել է. «Զարմանալի է, որ նման հոդված է տպագրվել: Մեր նախագահն է դա անում, նրանք կապեր ունեն: Տպագրվում են անհասկանալի բաներ, մենք կապ կհաստատենք նրանց հետ:
Մեզ հրավիրում է ոչ թե Washington Post-ը, այլ՝ ամերիկյան իշխանությունները: Թերթն իրավունք ունի հայտնել իր կարծիքը, սակայն մենք անպայմանորեն պահանջելու ենք օբյեկտիվություն: Մենք կարձագանքենք թերթի հրապարակմանը, կապ կհաստատենք նրա հետ և պատասխան կպահանջենք, թե ինչի հիման վրա են կատարվել այդօրինակ եզրակացություններ: Միայն Սաակաշվիլի՞ն է հրահանգել, թե՞ մեկ ուրշին է օգնել»:
Հիշեցնենք, որ The Washington Post թերթն Իվանիշվիլիին մեղադրել էր ընդդիմության առաջնորդներին ձերբակալելու և իշխանությունը մոնոպոլացնելու ձգտում ունենալու մեջ՝ չբացառելով, որ նոր իշխանությունների ժամանակ Վրաստանը կարող է շարժվել Ռուսաստանի և Ուկրաինայի ճանապարհով:
