Լիբանանի Հնչակյան կուսակցության վարիչ մարմնի ատենապետ Ալեքսան Քեոշքերյանը,«Առաջին լրատվական»-ի հետ զրույցում անդրադառնալով Լիբանանում ՀՀ նախագահ Սերժ Սարգսյանի` սիրիական ճգնաժամի վերաբերյալ ելույթին, ասաց, որ այն ի նպաստ սիրիահայերի էր:
Նա փաստեց, որ ինչպես և ենթադրվում էր, երկու երկրների նախագահները քննարկեցին Սիրիայի իշխանության և ընդդիմության միջև ստեղծված իրավիճակը: «Ես կարծում եմ, որ ընդհանրապեսհանդիպումը օգտակար էր և դրական տարբեր առումներով: Ես լսել եմ ելույթը: Իմ անձնական կարծիքով` պետք է, ինչպես ասաց ՀՀ նախագահը, Սիրիայում հակամարտությունը խաղաղ և երկխոսության միջոցով ավարտվի. դա են պահանջում մեր համայնքի շահերը»,- ասաց Ալեքսան Քեոշքերյանը:
Գնահատելով ՀՀ նախագահ Սերժ Սարգսյանի` Լիբանան կատարած պաշտոնական երկօրյա այցի կարևորությունը և նշանակությունը՝ մեր զրուցակիցն ասաց, որ այն շատ կարևոր և օգտակար էր մի քանի տեսանկյունից: Ըստ նրա՝ առաջին հերթին կարևոր էր Լիբանան-Հայաստան հարաբերությունների սերտացման իմաստով, նաև՝ մի շարք պայմանագրեր և փաստաթղթեր ստորագրվեցին:
«Տարիներ շարունակ լիբանանահայերիս ցանկությունն է եղել, որ Հայաստան-Լիբանան հարաբերությունները լինեն ավելի սերտ և ավելի ամուր: Ուրախ ենք, որ այս այցելությունը մեծապես նպաստեց դրան, և հանդիպման ժամանակ պայմանագրեր ստորագրվեցին` վիզաների վերացման, կրթությունը վկայող դիպլոմների ճանաչման և տարբեր մշակութային հարաբերությունների սերտացման ուղղությամբ»,- մանրամասնեց Ալեքսան Քեոշքերյանը՝ ընդհանուր առմամբ այցը գնահատելով դրական:
Հիշեցնենք, որ նոյեմբերի 26-27-ը պաշտոնական այցով Լիբանանում էր ՀՀ նախագահ Սերժ Սարգսյանը: Լիբանանի նախագահ Միշել Սուլեյմանի հետ բանակցությունների ընթացքում ՀՀ նախագահ Սերժ Սարգսյանն անդրադարձել էր սիրիական ճգնաժամին:
«Մենք դեմ ենք ուժի և բռնությունների կիրառմանը, և` ոչ միայն Սիրիայում: Անհնար է տևական լուծման հասնել առանց բոլորի կողմից ընդհարումների դադարեցման և առանց ընդգրկուն քաղաքական երկխոսության՝ հաշվի առնելով բոլոր սիրիացիների շահերը: Հայաստանը ողջունում է ՄԱԿ-ի գլխավոր քարտուղարի և Արաբական լիգայի հատուկ բանագնաց Լախդար Բրահիմիի առաքելությունը՝ սիրիական ներքաղաքական իրավիճակի կայունացման և խաղաղության հաստատման ուղղությամբ:
Լիահույս ենք, որ վերոհիշյալ նախաձեռնությունների կյանքի կոչման արդյունքում Սիրիայում կհաստատվի խաղաղություն, իսկ մոտ ապագայում հնարավոր կլինի իրականացնել այն անհրաժեշտ ժողովրդավարական բարեփոխումները, որոնք կարտացոլեն սիրիական ժողովրդի բոլոր հատվածների հավաքական կամքն ու իղձերը»,- ասել էր Սերժ Սարգսյանը:
