Грузия Online-ի փոխանցմամբ՝ Վրաստանի Ազգային անվտանգության խորհրդի (ԱԱԽ) քարտուղար Գիգա Բոկերիան ու Եվրոպայի և Ասիայի հարցերով ԱՄՆ փոխպետքարտուղար Էրիկ Ռուբինը քննարկել են Վրաստանի հետընտրական զարգացումները: Այդ հանդիպմանը ներկա են գտնվել նաև ԱՄՆ պաշտպանության փոխքարտուղարի օգնական Էվելին Ֆարկասը, Վրաստանի ԱԱԽ փոխքարտուղար Բատու Կուտելիան և Վրաստանում ԱՄՆ դեսպան Ռիչարդ Նորլանդը:
Կողմերը հայտարարել են, որ անհրաժեշտ է խորացնել երկու երկրների միջև պաշտպանական ու անվտանգության ոլորտներում առկա համագործակցությունը: Քննարկվել են նաև միջազգային անվտանգության մեջ Վրաստանի ներդրման, Ժնևյան բանակցությունների, ռուս-վրացական հարաբերությունների կարգավորման հարցերը, որոնք կարևոր են Վրաստանի արտաքին քաղաքականության համար:
Հանդիպման ժամանակ կողմերը հատուկ ուշադրություն են հատկացրել Վրաստանում անցկացված խորհրդարանական ընտրություններին և հետընտրական զարգացումներին:
