Սոցիոլոգիական հարցումը, որն անցկացվել է աշխարհի 44 երկրներում, ցույց է տվել, որ Ղրիմի բռնակցումից հետո Ռուսաստանի իմիջն աշխարհում զգալիորեն վատացել է: Ռուսաստանի ընկալումը զգալիորեն փոխվել է ուկրաինացիների և ամերիկացիների գիտակցության մեջ: Ռուսաստանի նախագահին հաճախ ավելի վատ են վերաբերվում, քան երկրին, որը նա կառավարում է: Կրեմլի քաղաքականությանը հավանություն տալիս են սակավաթիվ երկրներում՝ Հունաստանում, Չինաստանում, Բանգլադեշում, Քենիայում և մի քանի այլ երկրներում: Այս մասին փոխանցում է Newsru.com-ը:
Pew Research Center-ի տվյալներով՝ մեկ տարում Ռուսաստանին բացասաբար վերաբերվողների թիվը 43 տոկոսից հասել է 72 տոկոսի: Գործակալության վերլուծաբանները խոսում են սառը պատերազմի ժամանակաշրջանի հետ նմանության մասին:
Ռուսաստանի բացասական վարկանիշն աճել է 36 երկրներից 20-ում, որոնցում հարցումներն անցկացվում են երկու տարի անընդեջ, նվազել 6-ում և նույն մակարդակի վրա մնացել 10-ում: Առավել մեծ վատթարացում է գրանցվել Լեհաստանում, Գերանիայում, Իտալիայում, Իսպանիայում, Ֆրանսիայում, ԱՄՆ-ում , Մեծ Բրիտանիայում: ԱՄՆ-ում գրանցվել է 29 տոկոսանոց անկում, Մեծ Բրիտանիայում՝ 27 տոկոսանոց:
Հույներն առանձնանում են իրենց եվրոպացի հարևանների շարքում: Երկրի բնակիչների ընդամենը 35 տոկոսը չի հավանում Ռուսաստանը: Թիվն անցած տարվա համեմատ փոփոխության չի ենթարկվել:
Ինչպես նշվում է հաշվետվությունում, ներկայումս 10 ուկրաինացուց 6-ը վատ է վերաբերվում հարևան երկրին, մինչդեռ 2011-ին նրանց թիվն ընդամենը 11 տոկոս էր:
Ինչպես նախորդ տարիներին, Մերձավոր Արևելքում Ռուսաստանին վերաբերվում են ոչ այնքան լավ: Լիբանանում վերաբերմունքը տարբերվում է՝ կախված կրոնական պատկանելիությունից: Սուննիների 80 և քրիստոնյաների 63 տոկոսը վատ է վերաբերվում Ռուսաստանին, իսկ մուսուման շիաներից Մոսկվային խեթ է նայում միայն 12 տոկոսը:
Արդյունքները վատ չեն Լատինական Ամերիկայում: Ռուսաստանի ամենից մեծ թվով երկրպագուներ կան Նիկարագուայում՝ 45 տոկոս, ամենից շատ դժգոհողները բնակվում են Բրազիլիայում՝ 59 տոկոս:
Ասիայում Ռուսաստանի հավանության ամենաբարձր վարկանիշը գրանցվել է Վիետնամում՝ 75 տոկոս, Չինաստանում՝ 66 տոկոս:
44 երկրներից 25-ում հարցվածների մեծ մասը նշել է, որ չի վստահում Պուտինին և նրան սխալական է համարում իր արտաքին քաղաքական ուղղության մեջ:
