Վրացական «Արսենալի» պարբերականին տված հարցազրույցի ժամանակ Վրաստանի պաշտպանության նախարար, փոխվարչապետ Իրակլի Ալասանիան այսօր հայտարարել է, որ երկրի համար գլխավոր վտանգը ծագում է Աբխազիայում և Հարավային Օսիայում գտնվող ռուսական ռազմաբազաներից.
«Մենք պետք է ուժեղացնենք հատուկ նշանակության, օպերատիվ ուժերը: Մենք պետք է շեշտը դնենք հակաօդային պաշտպանության և հրետանային ապահովման ուղղության վրա: Մեր պաշտպանական համակարգը պետք է համապատասխանեցվի տարածաշրջանային վտանգներին:
Գլխավոր վտանգը մեր երկրում ապօրինի գտնվող ռուսական զինված ուժերի հետ մարտերի վերսկսման հնարավորությունն է: Դրա համար էլ շեշտը պետք է դրվի խաղաղության պահպանման և միջազգային հանրության վրա, ինչը ենթադրում է ԵՄ-ի դիտորդական առաքելության արդյունավետության աճ: Վրացական բանակը պետք է ունենա բարձր մարտունակություն:
Եթե մեզ վրա հարձակվի մեր հակառակորդը, մենք պետք է նրան այնպիսի վնաս պատճառենք, որը նրան կստիպի վերանայել հարձակումը: Վրաստանին մտահոգում է նաև Հյուսիսային Կովկասում տիրող իրավիճակը: Մենք պետք է պատրաստ լինենք արագորեն անցկացնել հակաահաբեկչական օպերացիաներ»:
