Ադրբեջանական Salam News լրատվական գործակալության փոխանցմամբ՝ Գաբալայի ռադիոտեղորոշիչ կայանի (ՌՏԿ) վերաբերյալ Ռուսաստանի և Ադրբեջանի միջև տարվող բանակցությունները գտնվում են վերջնական փուլում, և կողմերը հասել են որոշակի համաձայնության: Այս մասին հայտարարել է Ադրբեջանի խորհրդարանի անվտանգության և պաշտպանության հանձնաժողովի անդամ Զահիդ Օրուջը.
«Դժվար է ասել, թե բանակցությունների ժամանակ ամեն ինչ համաձայնեցվել է: Դա ոչ միայն ռադիոտեղորոշիչ համակարգի տեխնիկական օգտագործման հարցն է, այժմ այն ավելի շատ դարձել է աշխարհաքաղաքական խնդիր: Այդ հարցերն ամբողջովին կպարզվեն դեկտեմբերի սկզբին:
Ռուսաստանը միանշանակ շահագրգռված է համաձայնագրի երկարաձգմամբ, սակայն պաշտոնական Մոսկվան փորձում է իրականացնել գների նվազեցման քաղաքականություն: Նախնական տեղեկություններով, ստորագրվելու է միջանկյալ համաձայնագիր: Կողմերը համաձայնագիրը կստորագրեն նվազագույնը երեք տարով: Այդ հարցում այլ ճանապարհ չկա:
Բանակցությունները շարունակվում են, սակայն դրանց մանրամասները գաղտնի են պահվում, քանի որ Ռուսաստանը դեռ չի համաձայնել ներկայացված պայմաններին և առաջարկում է այլընտրանքային դիրքորոշում, մեջբերում է տարբեր տարբերակներ և անգամ դրա հետ կապված՝ ճնշում է բանեցնում Ադրբեջանի վրա»:
Հիշեցնենք, որ ներկայումս Ադրբեջանը Ռուսաստանից պահանջում է Գաբալայի ՌՏԿ-ի վարձավճարն ավելացնել 43 անգամ՝ 7 միլիոն դոլարից հասցնելով մինչև 300 միլիոն դոլարի:
