Բրիտանական լեգենդար The Rolling Stones խումբը 320 հազար դոլարի տուգանք կվճարի չափազանց երկար ելույթի համար, որը տեղի է ունեցել նոյեմբերի 25-ին Լոնդոնի О2 համալիրում: Ինչպես հաղորդում է բրիտանական The Sun թերթը, «ռոլինգների» առաջին հոբելյանական ելույթը տևել է նախատեսվածից 35 րոպե երկար:
Ենթադրվում էր, որ խումբը կավարտի իր ելույթը տեղի ժամանակով ժամը 22:30-ին, սակայն նրանք շարունակել են նվագել իրենց երկրպագուների համար՝ անտեսելով կանոնները: Խմբի գործակալի կարծիքով՝ տուգանքի գումարը մեծ է, «սակայն տղաներն իրենց գործն են անում»:
Հավանաբար, տուգանքը չի հուզի Միք Ջագերին և նրա խմբին, քանի որ նրանք արդեն վաստակել են 25 միլիոն դոլարի մաքուր եկամուտ: Հատկանշական է, որ 1962 թ. կայացած իրենց առաջին ելույթի ժամանակ The Rolling Stones խմբի մասնակիցները ստացել են յուրաքանչյուրը 8 դոլար:
Խմբի հաջորդ համերգը տեղի է ունենալու նոյեմբերի 29-ին Լոնդոնում, որից հետո ակնկալվում է երեք ելույթ ԱՄՆ-ում:
